शैक्षिक सत्र सुरु भएको आठ महिना बितिसक्दा पनि पाठ्यपुस्तक नपाएको गुनासो

  ०७३ आसोज २४ गते

शैक्षिक सत्र सुरु भएको आठ महिना बितिसक्दा पनि जिल्ला सदरमुकाम खलङ्गा बजारमा अवस्थित चन्दननाथ गुरुकुल पाठशालामा पाठ्यपुस्तकको अभाव रहेको विद्यार्थीहरूले गुनसो गरेका छन् । जुम्लालगायत कर्णाली अञ्चलमा फागुनदेखि शैक्षिक सत्र सुरु हुने गर्दछ ।

विद्यालयमा पाठयपुस्तक नपुग्दा पठनपाठनबाट विद्यार्थीहरू वञ्चित भएको सो विद्यालयका प्रद्यानाध्यापक विश्वराज उपाध्यायले बताए । उनले भने-'पाठ्यपुस्तक अभावका कारण विद्यालयका सबै विद्यार्थीलाई पाठ्यपुस्तक पुर्‍याउन सकिएको छैन । विद्यालयमा अध्ययनरत ३९ जना विद्यार्थी मध्ये १५ जनालाई मात्र पुस्तक वितरण गरेको छौं ।'

अपुग पाठ्यपुस्तकका लागि ०७३ वैशाखमा जिल्ला शिक्षा कार्यालयमा माग गरिएको भएपनि अहिलेसम्म विद्यार्थीको हातमा पुस्तक नआएको प्रद्यानाध्यापक उपाध्यायले बताए । दुई कक्षासम्म अध्यापन हुने पूर्व प्रावि चन्दननाथ गुरुकुल पाठशाला ०६९ सालमा स्थापना भएको हो । उक्त विद्यालयलाई ०७२ असारदेखि जिल्ला शिक्षा कार्यालय, जुम्लाले स्वीकृत दिएको विद्यालय प्रशासनले जनाएको छ ।

अघिल्लो वर्षमा पाठाशाला सञ्चालनका लागि १ लाख ३८ हजार बजेट विनियोजन गरिएकोमा यस आर्थिक वर्ष०७३/०७४ मा १ लाख ६४ हजार रुपियाँ विनियोजन गरिएको विद्यालय व्यवस्थापन समितिका अध्यक्ष गणेशप्रसाद उपाध्यायले बताए ।

जिल्ला शिक्षा अधिकारी कुलबहादुर फडेराले पाठ्यपुस्तक जिल्ला शिक्षा कार्यालयमा आइसकेको बताए । दसैँ विदा भएका कारणले तत्काल वितरण गर्न नसकिएको बताउँदै फडेराले विद्यालय सञ्चालन हुने वित्तिकै वितरण गरिने बताए ।


मानदत्त रावल