समाचारहरू

शैक्षिक सत्र ०७९ सकिनैलाग्दा समेत जिल्लाका अधिकांश विद्यालयहरुमा सबै विषयका पाठ्यपुस्तक नपुग्दा पढाई प्रभावित बनेको छ ।

शैक्षिक सत्रको अन्तिम महिनामा विद्यार्थीहरु वार्षिक परीक्षाको तयारीमा रहदा समेत यहाँका विद्यालयहरुमा सबै विषयका पाठ्यपुस्तक पुग्न नसकेको शिक्षा समन्वय इकाई प्रमुख नरेन्द्रप्रसाद अवस्थीले बताउनु भयो ।

उहाँले भन्नु भयो– ‘यो देशभरीको समस्या हो जस्तो लाग्दछ । समयमा पाठ्यपुस्तक पुग्दैन । केही विषयको पुस्तक नपुग्दा पुरानो पुस्तकले काम चलाउन भनेका छौँ । हामीले माथिल्लो निकायमा सोध्दा पुस्तक छाप्नै ढीलाई भयो भन्ने खबर आउछ ।’

जिल्लास्थित सबै विद्यालयहरुमा समयमा पाठ्यपुस्तक नपुग्ने समस्या विगतका वर्षहरुको जस्तै रहेको सिगास माध्यमिक विद्यालयका शिक्षक नरेन्द्र भट्टले बताउनु भयो ।

उहाँले भन्नु भयो– ‘विद्यार्थीहरुलाई पुरानो पुस्तक साथीबाट मागेर पढ्न भनेका हुन्छौँ । कतिपय पाना पुराना विद्यार्थीहरुले च्यातिसकेका हुन्छन् । यसले गर्दा पठनपाठनमा समस्या उत्पन्न हुँदै आएको छ  ।’

पाठ्यपुस्तक मात्रै नभई जिल्लामा गणीत, अंग्रेजी र विज्ञान विषयका विषयगत शिक्षकको समेत अभाव हुँदा यस क्षेत्रका बालबालिकाको पढाई प्रभावित बन्ने गरेको शिक्षा विकास तथा समन्वय एकाइ, बैतडीका सूचना अधिकारी पुष्करराज शार्माले बताउनु भयो ।

नरी बडु