शिक्षक शिक्षिकाबाट सामूहिक कुटपिट भएको पीडितको आरोप

छथर गाउँपालिका–१ का १६ वर्षीय बालक हिक्मत खड्कालाई विद्यालयका प्रधानाध्यापक, शिक्षक र शिक्षिकाले सामूहिक आक्रमण गरेको विषयमा प्रहरीमा उजुरी दिएपनि प्रहरीले उजुरी नलिएको पीडित पक्षले आरोप लगाएको छ ।

छथर गाउँपालिका–२ शुक्रवारेमा रहेको सरस्वती माध्यमिक विद्यालयमा कक्षा ११ मा अध्ययनरत विद्यार्थी खड्कालाई पुस ५ गते प्रार्थना लाइनका क्रममा शौचालय गएको आरोपमा अफिस कोठामा लगेर प्रधानाध्यापक छथर गापा–१२ का ५२ वर्षीय खगेन्द्र न्यौपाने, सोही ठाँउका ४६ वर्षीय शिक्षक दुर्गाप्रसाद खतिवडा र छथर गापा–१ की ३७ वर्षीया शिक्षिक अञ्जना कटुवालले सामूहिक कुटपिट गरेको पीडित विद्यार्थी हिक्मतले बताउनुभयो ।

सामूहिक रूपमा कुटपिट गरेको विषयमा प्रअ न्यौपानेले अफवाह मात्र फैलिएको बताउनुभयो । उहाँले घाइते हुने गरी कुटपिट नगरिएको तर चेतावनी भने दिएको बताउनु भयो ।

विद्यार्थीलाई सामूहिक रूपमा कुटपिट गर्ने विरूद्घ विद्यालयमा अध्ययनरत विद्यार्थीले पुस ६ गते प्रहरी चौकी शुक्रवारेमा उजुरी दिएपनि प्रहरीले उजुरी नलिएको पीडित विद्यार्थीका बाबु जगत खड्काले बताउनुभयो ।

शिक्षकको कुटपिटबाट टाउको र कानमा समस्या भएकाले पुस ७ गते बिपी कोइराला स्वास्थ्य विज्ञान प्रतिष्ठान (घोपा) धरान सुनसरी लगि उपचार गराइरहेको पीडित विद्यार्थीकी सानी आमा मनमाया बस्नेतले बताउनुभयो ।

विद्यार्थी कुटपिट गरेको विषयमा विद्यार्थी र अभिभावक आन्दोलित भएपछि विद्यालय प्रशासन, विद्यार्थी र अभिभावकबीच पुस ८ गते समस्या समाधानका लागि छलफल भएपनि छलफल बिना निश्कर्ष टुङ्गिएको स्थानीय पत्रकार प्रकाश लिम्बूले बताउनुभयो ।

यसैबीच पीडित पक्षले पुस ८ गते आरोपित विरूद्घ जिल्ला प्रहरी कार्यालयमा उजुरी दिएको डिएसपी नविनकिशोर प्रधानले बताउनुभयो ।

डिएसपी प्रधानले घटनाका विषयमा अनुसन्धान थालिएको र आरोपितहरूलाई प्रहरी कार्यालयमा झिकाएर कारबाही अघि बढाउने बताउनुभयो । अनुसन्धानका क्रममा दोषी देखिए कानुन बमोजिम कारबाही अघि बढाउने डिएसपी प्रधानको भनाइ छ ।


भगिश्वर लिम्बू