समाचारहरू

तीन वर्ष बितिसक्दा समेत विषयगत शिक्षकको व्यवस्था नहुँदा सिगास गाउँपालिका–८ स्थित लेकलुपुँड माध्यमिक विद्यालयका विद्यार्थीहरुको पढाई प्रभावित भएको छ । पटक–पटक विषयगत शिक्षकको माग गर्दा समेत शिक्षकको व्यवस्था हुन नसकेको विद्यार्थीहरुको गुनासो छ ।

विषयगत शिक्षकको अभावमा पठनपाठन प्रभावित भएको भए पनि सम्बन्धित निकाय जिम्मेवार नभएको भन्दै ०८१ भदौ १८ गतेदेखि विद्यार्थीहरुले विद्यालयमा तालाबन्दी समेत गरेका छन् । कक्षा ६ देखि ८ कक्षासम्म पढाउने नेपाली बिषय अध्यापन गराउने शिक्षकको माग गर्दै विद्यार्थीहरुले तालाबन्दी गरेको शिक्षक उत्तमबहादुर कुँवरले बताउनुभयो ।

लेकलुँपुड माविमा कक्षा ६ देखि ८ कक्षासम्म नेपाली बिषय अध्यापन गराउने शिक्षक देवसिंह धामीको २०७८ फागुनमा सिगास गाउँपालिका–२ स्थित रण आधारभूत विद्यालयमा काज सरुवा गरिएको थियो । सोही बेलादेखि विद्यालयमा नेपाली बिषय पढाउने शिक्षक नहुँदा पठनपाठन प्रभावित बनेको विद्यार्थीहरुको गुनासो छ ।

रिक्त शिक्षक दरबन्दीको माग गरेको तीन वर्ष बितिसक्दा समेत अहिलेसम्म शिक्षकको व्यवस्थापन नगरेकाले आन्दोलनमा उत्रिनुपरेको विद्यार्थी करन धामीले बताउनु भयो । नेपाली बिषय अध्यापन गराउने शिक्षकको व्यवस्था नहुञ्जेलसम्म आन्दोलनका कार्यक्रमहरु जारी राख्ने उहाँको भनाइ छ ।

यसअघि ०८१ भदौ ५ गते पनि विद्यार्थीहरुले विद्यालयमा शिक्षकको माग गर्दै तालाबन्दी गरेका थिए । त्यो दिन शिक्षकको व्यवस्थापन गर्ने सहमति भएपछि तालाबन्दी खोलिएको थियो । तर, अझैसम्म पनि विद्यालयमा शिक्षक भर्ना गर्ने प्रक्रिया सुरु भएको छैन् ।

नेपाली बिषय पढाउने शिक्षकको व्यवस्थापन नभएको भन्दै विद्यार्थीहरुले तालाबन्दी गरेको यो दोश्रो पटक हो । विद्यार्थीहरुको तालाबन्दीका कारण शिक्षकहरुले समेत हाजिर गर्न नपाएको शिक्षक कुँवरले बताउनु भयो ।

लेकलुपुँड माविमा दरबन्दी हुँदाहुँदै जबरजस्ती आफूलाई काज सरुवा गरेको भन्दै शिक्षक देवसिंह धामीले विद्यालयमा फर्कन मानेका छैनन् । यदपि उहाँको काज फिर्ता गरिएको छ ।

२०६१ सालदेखि लेकलुपुँड माविमा कार्यरत रहेका शिक्षक धामीले २०६८ सालदेखि प्रधानाध्यापकको  जिम्मेवारी समेत सम्हालेका थिए । उहाँले २०७८ माघ महिनामा प्रधानाध्यापकको जिम्मेवारी छोडेका थिए । त्यसको एक महिनापछि उहाँको काज सरुवा गरिएको थियो ।

अपमानित तरीकाले आफूलाई विद्यालयबाट काज सरुवा गरेको र अनिवार्य अवकाश पाउन दुई वर्ष मात्रै बाँकी रहेकाले आफू लेकलुपुँड माविमा जान नसक्ने शिक्षक धामीले बताउनु भयो ।

विद्यालयमा तालाबन्दी गरिएको बिषयमा जानकारी आएको र यो बिषयमा कार्यपालिका बैठकमा छलफल गरिने गाउँपालिकाका शिक्षा शाखा प्रमुख रमेश भट्टले बताउनु भयो । विद्यालयमा गरिएको तालाबन्दी खोल्न आग्रह गरिएको समेत उहाँको भनाइ छ ।

कक्षा १२ सम्मको पढाई हुने यस विद्यालयमा विद्यार्थीहरुले तालाबन्दी गरेपछि पठनपाठन पूर्ण रुपमा प्रभावित भएको छ ।

नरी बड