शिक्षक अनुपस्थित हुँदा पठनपाठन प्रभावित भएको भन्दै प्रशासनमा उजुरी

 

सिमकोट गाउँपालिका-७ स्थित कर्णाली मावि चौगानफयामा शिक्षक अनुपस्थित हुँदा एक महिनादेखि पठनपाठन प्रभावित भएको भन्दै अभिभावकले फागुन २९ गते जिल्ला प्रशासन कार्यालय, हुम्लामा उजुरी दिएका छन् ।

प्राथमिक तहका शिक्षक शिक्षक धनबहादुर परियार फागुन २ गतेदेखि विद्यालयमा उपस्थित नभएपछि विद्यार्थीको पठनपाठनमा प्रभावित भएको भन्दै गुनासो सुनुवाइका लागि प्रशासनमा उजुरी दिएको स्थानीय अभिभावक दिवबहादुर सिंहले बताए ।

सो विद्यालयमा प्राथमिक तहमा १ सय ५० जना विद्यार्थीका लागि सातजना शिक्षक कार्यरत छन् । शैक्षिक सत्र सुरू भएको एक महिना भइसक्दा पनि शिक्षकको लापरवाहीले विद्यार्थीको पठनपाठनमा समस्या भएको सिंहको भनाइ छ ।

शिक्षक परियार विद्यालयमा उपस्थित नभएपछि फागुन २९ गते १२ जना अभिभावकको टोली गई उजुरी गरेको स्थानीय जग शाहीले जानकारी दिए ।

शिक्षक परियारलाई कारबाहीको प्रकृया अगाडि बढाउन शिक्षा विकास तथा समन्वय इकाई, कार्यालयमा फागुन २९ गते नै पत्र पठाएको सहायक प्रमुख जिल्ला अधिकारी महेशकुमार पोखरेलले बताए ।

सो बारेमा शिक्षा विकास तथा समन्वय इकाई हुम्लाका प्रमुख वर्षफडेरासँग बुझ्दा शिक्षक परियारलाई झिकाएर उजुरी उपर छलफल गरिने प्रतिक्रिया दिए ।


नन्द सिंह