समाचारहरू

खोटेहाङ गाउँपालिका–६ पञ्चकन्या आधारभूत विद्यालयमा कार्यरत सोही ठाँउका ५० वर्षीय शिक्षक ताकमान राईलाई फागुन २५ गते मोसो र जुत्ताको माला लगाई दिएको आरोपमा प्रहरीले १९ वर्षीय तावेल राईलाई गिरफ्तार गरेको छ ।

मोहन वैद्य नेतृत्वको नेकपा क्रान्तिकारी माओवादी निकट अनेरास्ववियू क्रान्तिकारीका  प्रदेशसभा सदस्य,खोटेहाङ गाँउपालिका-६ का १९ वर्षीय तावेललाई अनुसन्धानका लागि गिरफ्तार गरेको जिल्ला प्रहरी कार्यालय खोटाङका इन्स्पेक्टर सागर साहले इन्सेक प्रतिनिधिसँगको फोन सम्पर्कमा बताउनु भयो ।

खोटेहाङ गाउँपालिका–६ इन्द्रेणीपोखरी नरहास्थित आधारभूत विद्यालयमा पुगेर आरोपितले शिक्षकलाई विद्यालयको चौरमा मोसो र जुत्ताको माला लगाई दिएको सूचना प्रहरीले पाएको इन्स्पेक्टर साहले बताउनु भयो ।

विद्यालयमा नियमित हाजिर नहुने, मादक पदार्थ सेवन गरी विद्यालयमा हाजिर हुने गरेका कारण शिक्षकलाई कारबाही गरिएको घटनाका आरोपित तावेलले इन्सेक प्रतिनिधिसँगको फोन सम्पर्कमा बताउनु भयो ।

खोटेहाङ गाउँपालिका अध्यक्ष ५४ वर्षीय प्रदीप राईले शिक्षकमाथि दुर्व्यवहार भएको बताउनु भयो । समूहमा आएकाहरुले शिक्षकमाथि अमानवीय व्यवहार गरेको भएपनि अन्यको पहिचान हुन नसकेको गाउँपालिका अध्यक्ष राईको भनाइ छ ।

राष्ट्रिय मानव अधिकार आयोग शाखा कार्यालय खोटाङका प्रमुख श्यामबाबु काफ्लेले शिक्षकमाथि भएको अमानवीय व्यवहार निन्दनीय भएको बताउनु भयो । उहाँले व्यक्तिको मर्यादामाथि आँच आउने गरी भएको घटना मानव अधिकारविपरित भएको बताउनु भयो ।

मानव अधिकार रक्षकसम्बन्धी घोषणापत्र सन् १९९८ ले शिक्षकलाई मानव अधिकार रक्षकको रूपमा परिभाषित गरेको छ ।

तारानाथ फुयल