समाचारहरू

सिमकोट गाउँपालिका-६ स्थित मानसरोवर माविका शिक्षकलाई कुटपिट गरेको घटनामा संलग्न आरोपितलाई कानुनी कारबाहीको मागगर्दै उक्त विद्यालयका शिक्षकहरूले भदौ ४ गते प्रमुख जिल्ला अधिकारीसमक्ष माग गरेका छन् ।

अर्धवार्षिक परीक्षा चलिरहेको अवस्थामा उक्त विद्यालयका निरीक्षक ३४ वर्षीय सौगात गौतम कक्षा कोठामा रहेको अवस्थामा भदौ २ गते बिहान १०ः३० बजे सोही विद्यालयको कक्षा १० मा अध्यनरत १७ वर्षीय छात्रा कुञ्जोक राप्सन लामाले कुटपिट गरेको आरोप छ ।

विद्यालय व्यवस्थापन समितिका अध्यक्ष नन्द रावतका अनुसार विद्यालयको पोसाक नलगाई आएका लामाले विद्यालय परिसर भित्र कक्षा कोठामा रहेका शिक्षकलाई कुटपिट गरेका हुन ।

पीडित गौतमको नाकको भित्री भागमा चोट लागेपछि प्राथमिक उपचार जिल्ला अस्पतालमा भयो भने थप उपचारका लागि जिल्ला बाहिर 'रिफर' गरिएको जिल्ला अस्पतालका प्रमुख डा.स्मृति महतले जानकारी दिइन ।

घटनाका सम्बन्धमा भदौ २ गते जिल्ला जिल्ला प्रशासन कार्यालयमा उजुरी दिएपनि सुनुवाइ नभएको पीडित पक्षको आरोप छ । स्थानीय प्रशासनले सुनुवाइ नगरेको भन्दै न्यायका लागि प्रमुख जिल्ला अधिकारी र जिल्ला शिक्षा अधिकारीको ध्यानाकर्षण गराएको सो विद्यालयका प्रद्यानाध्यापक अमरबहादुर शाहीले बताए ।

प्रमुख जिल्ला अधिकारी धनप्रसाद शर्माले आरोपित फरार भएकोले गिरफ्तार गर्न नसकिएको बताउँदै आरोपितको खोजी भइरहेको जानकारी दिए ।

नन्द सिंह