समाचारहरू

देवानगञ्ज गाउँपालिका-६ राजगञ्जस्थित जनता आधारभूत विद्यालयमा कक्षा सातमा अध्ययनरत १३ वर्षीय बालक आशिष मेहतालाई शिक्षकले मङ्सिर १० गते कुटपिट गरेको पीडित पक्षले आरोप लगाएको छ ।

देवानगञ्ज गाउँपालिका-६ का ३६ वर्षीय शिक्षक राजकुमार मेहताले गृहकार्य नगरेको र अनुशासन पालना नगरेको आरोपमा ०८१ मङ्सिर १० गते लठ्ठीले पिठ्यूमा निर्घात कुटपिट गरेको पीडितका ४५ वर्षीय बाबु लखन मेहताले बताउनु भयो ।

विद्यार्थीलाई तर्साउन बेञ्चमा लठ्ठीले हिर्काउँदा बालक सरेर लठ्ठीतिर आएकाले चोट लागेको आरोपित शिक्षक राजकुमार मेहताले बताउनु भयो ।

कुटपिटबाट बालकको पिठ्यूमा निलडाम देखिएको छ । बालकको स्थानीय क्लिनिकमा मङ्सिर १० गते उपचार गरिएको बालकका बाबु लखन मेहताले बताउनु भयो ।

घटनाका विषयमा मङ्सिर ११ गते भएको छलफलमा आरोपित शिक्षकले माफी मागेपछि मिलापत्र गरिएको लखन मेहताले बताउनु भयो ।

नेपालको शिक्षा ऐन, २०७६ र बालअधिकार ऐन, २०७५ ले बालबालिकामाथि शारीरिक वा मानसिक दण्ड दिन निषेध गरेको छ ।

बालअधिकार ऐनको दफा ६६ अनुसार, बालबालिकामाथि हिंसा गर्ने व्यक्तिलाई ३ वर्ष सम्मको कैद सजाय वा ३० हजार रुपियाँ जरिबाना, वा दुवै सजाय हुन सक्छ ।

नेपालको संविधान, २०७२ ले बालबालिकाको अधिकारलाई मौलिक हकको रूपमा सुनिश्चित गरेको छ ।

संविधानको धारा ३९ मा बालबालिकालाई शारीरिक, मानसिक वा यौन शोषणबाट बचाउनुपर्ने प्रावधान राखिएको छ ।

जयकृष्ण यादव