शिक्षकद्वारा रेडियो कर्णाली आवाजको कार्यालय र पत्रकारमाथि आक्रमण

सिमकोट गाउँपालिका-४ स्थित सामुदायिक रेडियो कर्णाली आवाजको कार्यालय रहेको भवनमा जेठ २५ गते राति १० बजे मानसरोवर उच्च माध्यमिक विद्यालयमा कार्यरत शिक्षकले तोडफोड गरेका छन् ।

अत्याधिक मदिरा सेवन गरी आएका शिक्षकहरूले समाचार कक्षमा रहेको कम्प्युटर, प्रिन्टर, टेलिफोन सेट, ल्यापटप र हिटर एक/एक थान तोडफोड गरी क्षति पुर्‍याएको रेडियो कर्णाली आवाजका स्टेशन म्यानेजर नवराज महतराले बताए ।

रेडियो कर्णालीमार्फत मनसरोवरका शिक्षकहरूले एसर्इइ मिरर ट्युसन पढाए बापतको रकम नदिएको आरोपमा खार्पुनाथ गाउँपालिका-१ निवासी सो विद्यालयमा कार्यरत शिक्षक ४५ वर्षीय अमरबहादुर शाहीको नेतृत्वमा आएको टोलीले रेडियोमा तोडफोड गरेको हो ।

उक्त रकम शिक्षक गणेशराज गिरीलाई जेठ २५ गते नै भुक्तानी दिइसकेको रेडियोले जनाएको छ । रुपियाँ नदिएको आरोपमा नियोजित ढङ्गले नेपाल पत्रकार माहासङ्घका अध्यक्षमाथि हातपात र रेडियोमा तोडफोड गरेको स्टेशन म्यानेजर महतराले बताए । तोडफोडमा सोही विद्यालयमा कार्यरत शिक्षक पाल्जोर लामा, नेत्रबहादुर शाही, रेशमराज रोकाय, नर बोहोरा र हिर बोहोरा लगायतको संलग्नता रहेको नेपाल पत्रकार महासङ्घका अध्यक्ष अर्जुन बोहोराले बताए ।

रेडियोमा तोडफोड पश्चात पत्रकार महासङ्घका जिल्ला अध्यक्ष एवम् रेडियो कर्णाली आवाजका मुख्य प्राविधिक ३७ वर्षीय अर्जुन बोहरालाई शिक्षकहरूले कुटपिट गरेका छन् । 'बसेर कुरा गरौँ, तोडफोड नगर्नुस्' भन्दाभन्दै मदिराले मातिएका नेत्रबहादुर शाहीले ढोकाको ठुलो हत्ताले अध्यक्ष बोहोराको टाउकोमा प्रहार गर्दै कुटपिट गरको पत्रकार महासङ्घका अध्यक्ष बोहोराले बताए । बोहोराको टाउकोमा चोट लागेको छ ।

उक्त घटनामा संलग्न शिक्षकलाई प्रहरीले सोही दिन गिरफ्तार गरेपछि अनुसन्धान भइरहेको जिल्ला प्रहरी कार्यालयका डिएसपी कमलप्रसाद नेपालले बताए ।


नन्द सिंह