समाचारहरू

लिखु गाउँपालिका–३ स्थित नर्मदेश्वरमा रहेको भिमसेनस्थान माध्यामिक विद्यालयको कक्षा ७ मा अध्ययनरत ११ वर्षीया छात्रा पार्वती श्रेष्ठलाई शिक्षक दीपक तामाङले कुटपिट गरेको पीडित पक्षले आरोप लगाएको छ ।

कक्षाकोठामा होहल्ला गरेको आरोपमा शिक्षक तामाङले पुस १ गते कुटपिट गरेको पीडित पक्षको आरोप छ ।

कुटपिटका कारण बालिका अचेत हुँदा घटना बाहिर आएको बालिकाका मामा बोधनारायण श्रेष्ठले बताउनुभयो ।

श्रेष्ठले कुटपिटका असरले बालिका बेहोस भएकाले तत्कालै स्थानीय स्वास्थ्य संस्थामा उपचार गरिएको बताउनुभयो ।

शिक्षक तामाङले कक्षा सञ्चालन भइरहेको अवस्थामा हल्ला गरेको भन्दै ढाडमा दुई मुक्का हानेको पीडित विद्यार्थी पार्वती श्रेष्ठले बताउनुभयो ।

कक्षा चलिरहेको समयमा अन्य साथीहरू हाँसेपछि आफू हाँसकाले सोही आरोपमा शिक्षकले कुटपिट गरेको पीडितको भनाइ छ ।

शिक्षकको कुटाइपछि आफ्नो छाति दुखेको र आँखा हेर्न समस्या भएको पीडित बालिकाले बताउनुभएको छ ।

आरोपित शिक्षक तामाङले कक्षा सञ्चालका समयमा हल्ला गरेपछि आफूले सामान्य सजाय दिएको स्वीकार गर्नुभएको छ ।

उहाँले विद्यार्थीलाई  चेतावनी स्वरूप ढाँडमा सामान्य कुटपिट गरेको बताउनुभयो । छात्रालाई शिक्षकले कुटपिट गरेको आफूलाई जानकारी नभएको प्रधानाध्यापक भिमप्रसाद सुबेदीले प्रतिक्रिया दिनुभयो । शिक्षकले कुटेलगत्तै विद्यार्थी रोएर बेहोस भएकाले विद्यार्थीले नाटक गरेको प्रअ सुबेदीको आरोप छ ।

घटनाबारे विद्यालय व्यवस्थापन समितिले थप बुझ्ने जानकारी दिएको छ । समितिका अध्यक्ष रमेश थापाले विद्यार्थीलाई कुटेको विषयमा आफूलाई विस्तृत जानकारी नभएकाले विद्यालयमा छलफल गराउने  बताउनुभयो ।

घटनाबारे उजुरी दिन उहाँले अभिभावकलाई अनुरोध गर्नुभएको पीडितका मामा बोधनारायण श्रेष्ठले बताउनुभयो । प्रहरीले विद्यार्थी कुटिएको विषयमा कुनै उजुरी नआएको जानकारी दिएको छ ।

शिवप्रसाद ढुङ्गाना