समाचारहरू

इगरब्रिज बोर्डिङ स्कुलमा अध्ययनरत १३ वर्षीय बालकलाई चैत ९ गते कुटपिट गरेको आरोपमा शिक्षक कृष्ण खड्काविरुद्ध पीडितका अभिभावकले चैत १० गते जिल्ला प्रहरी कार्यालयमा उजुरी दिएका छन् ।

पीडित बालकालाई कक्षा कोठामा सोधेको विषय नजानेको भन्दै शारीरिक र मानसिक यातना दिएको भन्दै अभिभावकले प्रहरीमा उजुरी दिएको बताए ।

आरोपितलाई कारवाहीको माग गरी निवदेन परेको जिल्ला प्रहरी कार्यालय सुर्खेतका इन्स्पेक्टर कनक शाहीले जानकारी दिनु भयो ।

इन्स्पेक्टर शाहीका अनुसार चैत ११ गते दुवै पक्षलाई जिल्ला प्रहरी कार्यालयमा बोलाएर भएको छलफलमा आरोपित शिक्षकले माफी मागेको र अबदेखि यस्तो घटनामा संलग्न नहुने प्रतिबद्धता जनाएपछि मिलापत्र भएको छ ।

आरोपित शिक्षकलाई कारवाही गरेर विद्यालयबाट निकालिएको विद्यालयका संस्थापक कृष्णा भुषालले जानकारी दिनु भयो ।

घटनाका विषयमा इन्सेकसहितको अधिकारकर्मीको टोलीसँग चैत १३ गते संस्थापक भुषालले घटनामा संलग्न शिक्षकलाई निकालिएको र अबका दिनमा यस्तो घटना हुन नदिने प्रतिबद्धता जनाउनु भयो ।

घटनाका विषयमा इन्सेकका कर्णाली प्रदेश संयोजक नारायण सुवेदी, मानव अधिकार रक्षक सञ्जाल कर्णाली प्रदेश संयोजक पिताम्बर ढकाल, मानव अधिकार रक्षक सञ्जाल सुर्खेतका संयोजक शर्मिला बिसी, गैरसरकारी संस्था महासङ्घका अशोक राजीसहितको टोलीले विद्यालयका संस्थापक कृष्णा भुषालसँग छलफल गरेको थियो ।

पूर्णबहादुर खड्का