शिक्षकको यातनाका कारण छात्रा बेहोस्, उपचारका लागि अस्पताल भर्ना

  ०७३ माघ १२ गते

शिक्षकको यातनाले भैरव जनता माध्यमिक विद्यालयमा कक्षा-६ मा अध्ययनरत छात्रा सुस्मिता रुचाल बेहोस भएपछि दुई दिनदेखि युनाइटेड मिसन अस्पताल तानसेनमा भर्ना गरिएको छ ।

जाडो विदाको समयमा दिएको गृहकार्य नगरेको भन्दै शिक्षक चिरञ्जीवि बास्तोलाले कुखुरा बनाएर कारबाही गर्ने क्रममा बेहोस भएपछि पीडित बालिकालाई उपचारका लागि अस्पतालमा भर्ना गरिएको हो । अहिले पनि उपचार भइरहेको छ ।

माघ १० गते सरले एक घण्टासम्म कुखुरा बनाएको र आफूले केही थाहा नपाएको पीडित बालिकाले बताएकी छन् ।

उपचारको क्रममा छात्रा रुचाललाई आन्द्राकोसमेत समस्या देखिएपछि काठमाडौँ रिफर गर्न लागिएको सुस्मिताका काका सुमित रुचालले जानकारी दिए । शिक्षक बास्तोलाले गृहकार्य नगर्ने अरु विद्यार्थीलाई पनि कुखुरा बनाएर कारबाही गर्ने गरेको अभिभावकहरूले आरोप लगाएका छन् ।

पाल्पाका डिएसपी रमेश पण्डितले यसबारे प्रहरीमा उजुरी नआएको बताए । विद्यालयका प्रधानाध्यापक नारायण कुँवरले भने शिक्षकले सामान्य कारबाही गर्ने क्रममा यो घटना भएको बताए ।

जिल्ला शिक्षा कार्यालय पाल्पाका सहायक जिल्ला शिक्षा अधिकारी रेशमलाल न्यौपानेले जिल्ला शिक्षा कार्यालयमा यसरबारे मौखिक जानकारी आएको र विद्यार्थी सङ्गठनका प्रमुख, विद्यालयका प्रअ र सरोकारवालाको बैठक बसेर आरोपित उपर कारबाही प्रक्रिया अगाडि बढाउने बताए ।


यज्ञमूर्ति तिमिल्सिना