शिक्षकको मुद्दा छिनोफानो नहुँदा विद्यार्थीको पढाइ प्रभावित

 

प्रधानाध्यापकले किर्ते गरेर शिक्षाको नियुक्ति गरेको विषयमा आरोपप्रत्यारोपपछि मुद्दामामिलासमेत भएकाले गएको चैत महिनादेखि उदयदेवस्थित पीपलकोट उमाविमा अध्ययनरत सयौँ बालबालिकाको पढाइ प्रभावित भएको छ ।

पीपलकोट उमाविका तत्कालीन प्रधानाध्यापक रमेशदत्त ओझाले विद्यालय व्यवस्थापन समितिको पदाधिकारीको नाममा नक्कली हस्ताक्षर गरी रामसिंह महता र सुनिताकुमारी धामीलाई नियुक्त गरेको आरोप छ । मुद्दामामिलाका कारण देखाउँदै विद्यालयका तत्कालीन प्रधानाध्यापक र ती शिक्षक ०७३ भदौदेखि विद्यालयमा आएका छैनन् । सो विद्यालयमा ६ सय ७० जना विद्यार्थी अध्ययनरत रहेको विद्यालय प्रशासनले जनाएको छ ।

विद्यालयका प्रधानाध्यापक मोहनसिंह ठगुन्नाका अनुसार पढ्न आएका विद्यार्थीहरू शिक्षकको अनुपस्थितिमा त्यत्तिकै बस्न बाध्य छन् ।

परीक्षाको समय नजिकिनै लाग्दा समेत आफ्ना बालबालिकाको पढाइप्रति खेलबाड गरिएकाले तत्काल जसरी भएपनि शिक्षकको व्यवस्था गरी बालवालिकाको पढ्न पाउने अधिकार सुनिश्चित गर्नुपर्ने विद्यालय व्यवस्थापन समितिका सदस्य करनसिंह साउदको भनाइ छ ।

विद्यालय व्यवस्थापन समितिको किर्ते हस्ताक्षर गरेको घटनाका दुवै पक्ष नियुक्त गरिएका शिक्षक र तात्कालीन प्रधानाध्यापक अहिलेसम्म सम्पर्कमा नआएको र उनीहरूकै कारणले विद्यालयको पढाइ प्रभावित बनेको विद्यालय व्यवस्थापन समितिका अध्यक्ष श्यामसिंह महताले आरोप लगाए ।

जिल्ला शिक्षा समितिको सिफारिसमा जिल्ला शिक्षा कार्यालयले नियुक्ति लिने र दिने दुवै पक्षलाई निष्काशन गरेको जिल्ला शिक्षा अधिकारी लालसिंह टेरले बताए ।

उनले पीपलकोट उमाविको मुद्दा मामिलाले पढाइमा समस्या भएको बताए । जिशिअ टेरले तत्कालीन प्रधानाध्यापक ओझाले किर्ते गरेको प्रमाण फेला परेपछि उनले गरेका निर्णय बदर भएकोसमेत बताए ।

निष्कासित शिक्षकद्वयले पुरावेदन र सर्वोच्चमा मुद्दा हालेको र त्यसको अन्तिम किनारा नलागेकाले समस्या भएको उनको भनाइ छ ।

किर्ते गरेको आरोपमा जिम्मेवारीबाट हटाइएका प्रधानाध्यापक र शिक्षकको मागअनुसार पहिलेकै जिम्मेवारी दिन सर्वोच्च अदालतले अन्तरिम आदेश दिएको थियो । तर, फैसलामा ढिलाइ भएपछि विद्यालय व्यवस्थापन समिति पनि आफैँले छिटो सुनुवाइ गर्न भन्दै सर्वोच्च अदालतमा रिट हालेको छ ।

सयौँ विद्यार्थीको भविष्यसँग जोडिएको विषयमा सुनुवाइ नभएपछि वारेसका रूपमा कर्मराज अवस्थीले विद्यालय व्यवस्थापनका तर्फबाट 'शीघ्र सुनुवाइ गरी कारबाही किनारा लगाइपाऊँ' भन्दै ०७३ कात्तिक २४ गते सर्वोच्चमा रिट निवेदन हालेका थिए ।

०७३ भदौ २३ गते विद्यालय व्यवस्थापन समितिले जिल्ला प्रहरी कार्यालयमा सरकारी कागजात किर्ते गरी अपराध गरेको आरोपमा उनीहरूविरुद्ध उजुरी दिएको थियो ।

उजुरी आएपछि आवश्यक अनुसन्धानका लागि भन्दै तत्कालीन प्रधानाध्यापक ओझासहित शिक्षकद्वय रामसिंह महता र सुनिताकुमारी धामीलाई प्रहरीले खोजी गरिरहेको जिल्ला प्रहरी कार्यालयका डिएसपी बालनरसिंह राणाले बताए ।


नरी बडु