समाचारहरू

जिल्लाको रौलेश्वर गाविसमा रहेको एक प्राथमिक विद्यालय एक जना शिक्षकको भरमा मात्रै सञ्चालन हुँदा विद्यार्थीको पढाइ प्रभावित भएको छ ।

२०५० सालमा स्थापना भएको रौलेश्वर-८ मा रहेको रौलेश्वर घट्टेपात्थर प्राथमिक विद्यालयमा एकजना शिक्षकको मात्रै दरबन्दी भएकाले यहाँका विद्यार्थीको पढाइ प्रभावित भएको हो ।

पहिले निजी श्रोतबाट शिक्षक भर्ना गरिएको भएपनि अहिले आर्थिक अभावमा निजी स्रोतबाट काम गर्ने शिक्षक राख्न नसकिएको विद्यालयका प्रधानाध्यापक कर्णबहादुर मडैले बताए ।

'विद्यालयसँग आर्थिक स्रोत छैन ।'-उनले भने-'निजी स्रोतबाट राखेको एकजना शिक्षकलाई समेत तलब भत्ता खुवाउन सकिएको छैन ।' कक्षा ५ सम्मको पढाइ हुने सो विद्यालयमा १ सय ८ जना विद्यार्थी अध्ययनरत छन् ।

विद्यालयमा शिक्षकको अभाव हुँदा विद्यार्थीको पढाइ कमजोर बन्दै गएको प्रति स्थानीय अभिभावक धर्मसिंह मडैले गुनासो गरे ।

उक्त विद्यालयमा दुई जना शिक्षकले पाँच ओटा कक्षा सञ्चालन गर्नु परिरहेको र कुनै शिक्षक अनुपस्थित भएमा एक जनाले कक्षा ५ सम्म अध्यापन गर्नुपर्ने बाध्यता रहिआएको रौलेश्वर पूर्व विद्यार्थी समाजका अध्यक्ष रिजन मडैले बताए ।

शिक्षा ऐन-२०२८ को आठौँ संशोधन अनुसार नयाँ ऐन आइसकेको र नियमावली आउन लागेकोले रिक्त दरबन्दी भए दरबन्दी मिलान गर्न सकिने तर थप दरबन्दी भने तत्काल दिन नसकिने जिल्ला शिक्षा अधिकारी लालसिंह टेरले जानकारी दिए ।

नरी बडु