शारिरीक अपाङ्गता तथा मनोसामाजिक समस्या भएका बालकको उद्दारका लागि इन्सेकको पहल

  ०७८ असार २९ गते

शारिरीक तथा मनोसामाजिक समस्या भएका फिदिम नगरपालिका–८ का ११ वर्षीय बालक किरण मगरको उद्दारका लागि इन्सेकले पहल सुरू गरेको छ ।

आर्थिक अवस्था कमजोर भएका कारण उपचार गर्न नसकेपछि परिवारले खोरमा राखेर हेरविचार गर्दै आएका बालकको असार २६ गते इन्सेक प्रतिनिधिले अनुगमन गरी उद्दारको पहल गर्नु भएको छ । बालकको अवस्था बुझेपछि इन्सेक प्रतिनिधिले असार २७ गते बालकको उद्दार, संरक्षण र उपचारका लागि असार २७ गते बालबालिकाको क्षेत्रमा क्रियाशील संस्थामा निवेदन दिनु भएको छ ।

बालकको उद्दार, उपचार र संरक्षणका लागि इन्सेक पाँचथर प्रतिनिधि मङ्गल वेघाले मानव अधिकार मञ्च इलाममा असार २७ गते निवेदन दिएको मानव अधिकार मञ्च नेपालका कार्यकारी निर्देशक देवेन्द्र विश्वकर्माले बताउनु भयो । इन्सेकले बालकको उद्दारका लागि राष्ट्रिय बाल अधिकार परिषद, बाल हेल्प लाईन १०९८ मा पनि निवेदन दिएको छ ।

शारिरीक अपाङ्गता भएका छोरामा मनोसामाजिक समस्यासहित हिड्डुलमा समस्या भएको, वाक् क्षमता नभएको, शौच गरेको वा नगरेको जस्ता समस्या देखिएपछि उपचार गराए पनि उपचार सफल नभएको बाबु सन्देश मगरले बताउनु भयो । आर्थिक अवस्था कमजोर भएका कारण सुविधा सम्पन्न अस्पतालमा लगेर छोराको उपचार गर्न नसकिएको बाबु सन्देशले इन्सेक प्रतिनिधिसँगको भेटमा बताउनु भयो । उहाँले उपचार खर्च अभाव भएपछि छोरालाई खोरमा थुनेर राखिएको बताउनु भयो ।

नेपालको संविधान २०७२ ले धारा ३९ मा बालबालिकाको हक सम्बन्धी हकलाई मौलिक हकको व्यवस्था गरेको छ । सोही धाराको उपधारा ८ मा प्रत्येक बालबालिकालाई बाल अनुकूल न्यायको हक हुनेछ भन्ने उल्लेख छ । असहाय, अनाथ, अपाङ्गता भएका, द्घन्द्घपीडित, विस्थापित एवम् जोखिममा रहेका बालबालिकालाई राज्यबाट विशेष संरक्षण र सुविधा पाउने हक उपधारा ९ मा व्यवस्था गरिएको छ ।

Photo 20210709 Pachathar (2)Nibedan 20210709 Panchathar  Photo 20210709 Pachathar (3) Photo 20210709 Pachathar (4)


मङ्गल वेघा