'शान्ति प्रक्रियालाई टुङ्गोमा पुर्‍याउन प्रयासरत छु'-मन्त्री यादव

  ०७३ कात्तिक २८ गते

शान्ति तथा पुनर्निर्माण मन्त्री सितादेवी यादवले शान्ति प्रक्रियालाई टुङ्गोमा पुर्‍याउन आफू प्रयासरत रहेको बताएकी छन् । कात्तिक २८ गते पोखरामा आयोजित अर्न्तक्रिया कार्यक्रममा बोल्दै मन्त्री यादवले आफ्नो कार्यकाल भित्र ७५ ओटै जिल्लामा पुगी द्वन्द्वपीडित परिवारलाई भेटेर उनीहरूका समस्या समाधान गर्न लागिपर्ने योजना सुनाइन् ।

मन्त्री यादवले राहत वितरणका क्रममा छुटेका द्वन्द्वपीडित परिवारलाई वितरण गर्न बाँकी रहेको रकम तुरुन्तै वितरण गर्ने समेत बताइन् ।

उनले द्वन्द्वका क्रममा मानसिक रूपमा विक्षिप्त, विस्थापित, बेपत्ता तथा मृतक परिवारलाई राहत दिन ऐन परिवर्तनको आवश्यकता भए सोका लागिसमेत पहल गर्ने प्रतिवद्धता व्यक्त गरिन् ।

कास्कीका प्रमुख जिल्ला अधिकारी हरिप्रसाद मैनालीले कास्की जिल्लामा राहत वितरणका क्रममा छुटेका द्वन्द्वपीडित परिवारबारे बुझेर मन्त्रालयमा विवरण पठाउने बताए ।

अन्तर्क्रिया कार्यक्रममा स्थानीय शान्ति समिति कास्कीका सचिवालय सदस्य खगराज आर्चायले ०६७ सालमा स्थापित स्थानीय शान्ति समिति कास्कीले द्वन्द्वपीडितका परिवारसँग नियमित भेटघाट गरिएको बताए ।

अन्तर्क्रिया कार्यक्रममा बोल्दै स्थानीय शान्ति समितिकी सदस्य शान्ति पौडेलले सरकारले गठन गरेका सत्य निरूपण तथा मेलमिलाप आयोग र बेपत्ता पारिएका व्यक्तिको छानबिन आयोगहरूले द्वन्द्वकालिन मुद्दाहरूको अनुसन्धान चाँडो गरेर न्याय दिलाओस भन्ने पीडितको इच्छा रहेको बताइन् ।


इन्सेक पश्चमाञ्चल क्षेत्रीय कार्यलय पोखरा