समाचारहरू

निर्वाचन आयोगले राजनीतिक दल र उम्मेदवारलाई प्रतिनिधि सभा र प्रदेश सभा सदस्यको निर्वाचनमा प्रत्यक्ष निर्वाचित हुने निर्वाचन प्रणालीतर्फो उम्मेदवारीको मनोनयन दर्ता शान्तिपूर्ण एवम् उत्साहजनकरूपमा गर्न आह्वान गरेको छ ।

दोस्रो चरणमा निर्वाचन हुने ४५ जिल्लाहरूमा कात्तिक १६ गते पहिलो हुने निर्वाचित हुने निर्वाचन प्रणालीतर्फको उम्मेदवारीको मनोनयन दर्ताको कार्यक्रम रहेको  छ । निर्वाचन आयोगले कातिक १५ गते आयोगको कार्यालयमा आयोजना गरेको पत्रकार सम्मेलनमा उम्मेदवारीको सम्पुर्ण तयारी पूरा भएको बताउँदै निर्वाचन आयोगका प्रमुख निर्वाचन आयुक्त डा. अयोधीप्रसाद यादवले यस्तो आह्वान गरेका हुन् ।

नेपालको संविधानको सफल कार्यान्वयन गर्न प्रतिनिधि सभा र प्रदेश सभा सदस्यको निर्वाचन एकै पटक मङ्सिर १० र २१ गते गरी दुई चरणमा गरिँदैछ । ४५ जिल्लामा प्रतिनिधि सभा सदस्यतर्फ १ सय २८ निर्वाचन क्षेत्र र प्रदेश सभातर्फ २ सय ५६ निर्वाचन क्षेत्रमा उम्मेदवारहरूले मनोनयन दर्ता गर्ने कार्यक्रम तालिका छ ।

कात्तिक १६ गते बिहान १० बजेदेखि साँझ ५ बजेसम्म आ-आफ्नो निर्वाचन क्षेत्रको मुख्य निर्वाचन अधिकृत वा निर्वाचन अधिकृतको कार्यालयमा उम्मेदवारी दर्ताका गराउन सकिने व्यवस्था आयोगले गरेको छ । निर्वाचनका लागि आवश्यक सुरक्षा व्यवस्था मिलाइएको जनाउँदै यादवले सबै मुख्य निर्वाचन अधिकृत, निर्वाचन अधिकृत, प्रमुख जिल्ला अधिकारीहरूलाई मनोनयन दर्ता कार्यक्रमलाई व्यवस्थित, मर्यादित र भयरहित ढङ्गले अघि बढाउन समयमै आवश्यक पहल गर्न आग्रह गरेको छ ।

निर्वाचनका लागि आवश्यक सामग्री आयोगमा प्राप्त हुने क्रम जारी रहेको र मतदाता नामावली छपाई कार्य सम्पन्न भइसकेको आयोगले पत्रकार सम्मेलनमा जानकारी दिएको छ । समानुपातिक निर्वाचन प्रणालीतर्फको १ करोड ७४ लाख मतपत्र छपाई गर्ने काम सम्पन्न भएको आयोगले जनाएको छ ।

सर्वोच्च अदालतको आदेशअनुसार पहिलो हुने निर्वाचित हुने प्रणालीतर्फ प्रतिनिधि सभा सदस्य र प्रदेश सभा सदस्यका लागि छुट्टाछुट्टै पानामा मतपत्र छपाइ गर्ने कार्य सुरू भइसकेको पनि जनाइएको छ । आयोगले प्रतिनिधि सभा सदस्यका लागि हरियो रङमा निर्वाचन चिन्ह भएको मतपत्र र प्रदेश सभाका लागि कालो रङमा निर्वाचन चिन्हहरू रहने गरी मतपत्रको ढाँचा स्वीकृत गरी २१ जिल्लाको मतपत्र छाप्न पठाइसकेको छ । कात्तिक २० गतेसम्म पहिलो चरणमा निर्वाचन हुने ३२ जिल्लाका सम्पुर्ण मतपत्र छपाई गरी सम्बन्धित जिल्लामा पठाउने कार्य योजना अनुसार तीव्र गतिमा काम भइरहेको प्रमुख निर्वाचन आयुक्त डा. यादवले बताए ।

यसैगरी आयोगले भदौ १४ गतेदेखि लागू भएको निर्वाचन साचारसंहिताको सबै पक्षबाट पूर्ण पालना हुने विश्वास व्यक्त गरेको छ ।  कहीँ कतैबाट आचारसंहिता उल्लङ्घन भएमा आवश्यक कारबाही गर्न ७७ जिल्लामा मुख्य निर्वाचन अधिकृत/निर्वाचन अधिकृत, प्रमुख जिल्ला अधिकारीलगायतलाई आवश्यक निर्देशन दिइसकेको डा. यादवले बताए ।

सुभाष साह