समाचारहरू

शहरी क्षेत्रमा बसोबास गर्ने बालबालिकामा कुपोषणको समस्या बढी भेटिएको छ । पाल्पाका दुई ओटा नगरपालिका र आठ ओटा गाउँपालिकामध्ये तानसेन नगरपालिका र रामपुर नगरपालिका भित्र बढी कुपोषणका बालबालिका फेला परेको स्वास्थ्य कार्यालय पाल्पाका प्रमुख डा. राजेन्द्र गिरीले जानकारी दिनुभयो ।

जिल्ला स्वास्थ्य कार्यालय पाल्पाले १० स्थानीय तहका ४ हजार ८ सय ३१ जना बालबालिकाको कुपोषणको अवस्था परीक्षण गरेको थियो । रामपुर नगरपालिकामा १३ जना र तानसेन नगरपालिकामा सात जना बालबालिकामा कडा खालको कुपोषण देखिएको डा. गिरीले बताउनु भयो ।

बगनासकाली गाउँपालिकामा चार जना, निस्दी गाउँपालिकामा दुई जना, तिनाउँ र रम्भा गाउँपालिकामा एक/एक जना गरी जिल्लाभर जम्मा २८ जना बालबालिकामा कडा खालको कुपोषण देखिएको उहाँले बताउनु भयो । यसरी कडा कुपोषण देखिएका बालबालिकाहरूलाई थप उपचारका लागि पुनर्स्थापना केन्द्र पठाइएको उहाँले बताउनु भयो । सामान्य खालका कुपोषण देखिएका बालबालिकाका अभिभावकहरूलाई समेत परामर्श प्रदान गरिएको डा. गिरीले जानकारी दिनुभयो ।

ग्रामीण क्षेत्रको तुलनामा शहरी क्षेत्रका बालबालिकामा बढी कुपोषणको अवस्था देखिएको डा. गिरीले बताउनु भयो । दैनिक पत्रु खानाका कारण यसरी कुपोषणको समसय देखिएको उहाँको भनाइ छ । पछिल्लो समय तयारी खाना, जस्तै चाउचाउ, बिस्कुट, चाउमिन, मम, लेज कुरकुरे जस्ता खानेकुरा बालबालिकालाई खुवाउँदा कुपोषणको समस्या बढेको उहाँले उल्लेख गर्नुभयो । कुपोषणको सुधारका लागि परम्परागत र घरमै बनाएका खानेकुरा, हरियो सागपात, फलफूल बालबालिकालाई खुवाउनुपर्ने डा. गिरीले बताउनु भयो ।

यज्ञमूर्ति तिमिल्सिना