समाचारहरू

प्रस्तावित अपर तामाकोशी जलाविधुत आयोजनाको लप्सीफेदी सब स्टेशन निर्माणका लागि अस्थायी क्याम्प खडा गर्न खटिएको सशस्त्र प्रहरी र सब स्टेशन निर्माणको विपक्षमा रही आन्दोलित स्थानीयबीच शंखरापुर नगरपालिका-३, बोझेनीमा ०८० मङ्सिर १ गते झडप हुँदा ६ जना स्थानीय, सशस्त्र प्रहरीका डिएसपी देवराज राईसहित दुई जना र नेपाल प्रहरीका एक जवान घाइते भएका छन् । त्यसैगरी प्रहरीले झडपमा संलग्न भएको भन्दै चार जनालाई गिरफ्तार समेत गरेको छ ।

सशस्त्र प्रहरीसँगको झडपमा परी घाइते हुनेहरूमा शंखरापुर नगरपालिका-३, बोझेनीका ३२ वर्षीय सचिव तामाङ, शंखरापुर नगरपालिका-३, बोझेनीकी ४६ वर्षीया तिउरी तामाङ, शंखरापुर नगरपालिका-३, बोझेनीका ४० वर्षीय मान बहादुर तामाङ, शंखरापुर नगरपालिका-३, बोझेनीकी ४८ वर्षीया संचिमाया तामाङ, शंखरापुर नगरपालिका-३, बोझेनीका ३६ वर्षीय फुर्साङ लामा र शंखरापुर नगरपालिका-३, बोझेनीका ३३ वर्षीय मनोज तामाङ रहेका छन् । घाइतेहरू साँखुस्थित सुष्मा कोइराला मेमोरियल अस्पतालमा उपचारपश्चात डिस्चार्ज भएको राष्ट्रिय सीमान्तिकरण विरुद्ध अभियान (समान) नेपालका प्रवक्ता आरके तामाङले इन्सेकलाई जानकारी दिनुभयो ।

स्थानीयसँगको झडपमा परी सशस्त्र प्रहरीका डिएसपी देवराज राईसहित दुई जना र नेपाल प्रहरीका एक जवान घाइते भएको जिल्ला प्रहरी परिसर काठमाडौँका प्रवक्ता एसपी कुमोद ढुङ्गेलले जानकारी दिनुभयो । घाइते सुरक्षाकर्मीहरूको साँखुस्थित सुष्मा कोइराला मेमोरियल अस्पतालमा उपचार भइरहेको एसपी ढुङ्गेलले बताउनु भयो ।

त्यसैगरी प्रहरीले सब स्टेशन निर्माणको सुरक्षार्थ अस्थायी क्याम्प निर्माण गर्न गएको सशस्त्र प्रहरीको टोलीमाथि आक्रमण गरेको आरोपमा शंखरापुर नगरपालिका-३ का ३६ वर्षीय जयमान जयमान वाईवा, शंखरापुर नगरपालिका-३ का ४५ वर्षीय हर्कमान वाईवा, शंखरापुर नगरपालिका-३ का ४२ वर्षीय सुकबहादुर वाईवा, शंखरापुर नगरपालिका-३ का २६ वर्षीय सुर्यमान तामाङलाई गिरफ्तार समेत गरेको छ । जिल्ला प्रहरी परिसर काठमाडौँका प्रवक्ता एसपी कुमोद ढुङ्गेलका अनुसार प्रहरीको टोलीमाथि आक्रमण गरेको आरोपमा उनीहरूलाई गिरफ्तार गरिएको हो । गिरफ्तारीमा परेका चारै जनालाई अनुसन्धानका लागि प्रहरी वृत्त, बौद्धमा राखिएको एसपी ढुङ्गेलले जानकारी दिनुभयो ।

विमल पौडेल