समाचारहरू

१६ वर्षीया बालिकालाई शरीर बन्धक बनाएको आरोपमा महाङ्काल गाउँपालिका-३, गोटिखेलका २० वर्षीय सुमन न्यासुरलाई ०८० असार २६ गते प्रहरीले गिरफ्तार गरेको छ ।

पीडित बालिकालाई आरोपितले ललाइ फकाइ प्रलोभनमा पारी विवाह गर्ने आश्वासन दिइ महाङ्काल गाउँपालिका-६, ठुलादुर्लुङस्थित बुद्ध ठोकरको घरमा लगी असार २२ गतेदेखि शरीर बन्धक बनाएर राखेको भन्दै पीडित पक्षले असार २४ गते प्रहरी वृत्त, चापागाउँमा उजुरी दिएको थियो ।

पीडित परिवारको उजुरीपछि खोजी गरी आरोपित न्यासुरलाई ठुलादुर्लुङबाट गिरफ्तार गरिएको प्रहरी परिसर ललितपुरका प्रमुख एसएसपी शिद्धिविक्रम शाहले जानकारी दिनुभयो ।

पीडित बालिकाको स्वास्थ्य परीक्षण असार २६ गते पाटन अस्पतालमा गरिएको अस्पतालका निर्देशक डाक्टर रवि शाक्यले जानकारी दिनुभयो ।

जिल्ला अदालतबाट असार २७ गते पाँच दिनको म्याद थप गरी शरीर बन्धक मुद्दामा अनुसन्धान भइरहेको एसपी एवम् प्रवक्ता नवराज कार्कीले बताउनु भयो ।

दीपकप्रसाद घिमिरे