समाचारहरू

कमलामाई नगरपालिका-४, ढकाल गाउँकी ३८ वर्षीया शारदा थापालाई चार दिनसम्म बन्धक बनाई कुटपिट गरेको आरोपमा सोही ठाउँका ६२ वर्षीय एक्कबहादुर खड्का, ३९ वर्षीय मिलन देवकोटा, ३४ वर्षीय निकेश ढकाल, ४२ वर्षीय विष्णु कुमार ढकाल, ३८ वर्षीय इश्वर पोखरेल, ५२ वर्षीय वीर विक्रम ढकाल र पीडितका पति ४२ वर्षीय सन्तोष थापा विरुद्ध जिल्ला प्रहरी कार्यालयमा ०८० पुस ११ गते उजुरी दर्ता भएको छ ।

पीडित महिलालाई चार दिनसम्म बन्धक बनाई कुटपिट गरेको भन्दै पीडित पक्षले जिल्ला प्रहरी कार्यालयमा उजुरी दिएको जिल्ला प्रहरी कार्यालयका एसपी राजकुमार सिलवालले जानकारी दिनुभयो ।

इन्सेक अनलाइनमा पुस १० गते 'बन्धक बनाई कुटपिट घटनाका आरोपितहरू गिरफ्तार' शीर्षकमा समाचार प्रकाशन भएको थियो । पीडित महिलाले पुस ५ गते रातिदेखि आफूलाई बन्धक बनाएको, खाँबो र बिजुलीको पोलमा डोरीले बाँधी कुटपिट गरेको बताउनुभएको छ ।

आरोपितहरूले शरीर बन्धक बनाई कुटपिट गरी रहेको अवस्थामा पुस ८ गते दिउँसो एसपी सिलवालले घटना स्थलबाट पीडितलाई अर्धचेत अवस्थामा उद्धार गर्नुभएको थियो । पीडितको सिन्धुली अस्पतालमा उपचारपछि पुस ९ गते सेफ हाउसमा राखिएको छ ।

शारदाका पति सन्तोषले आफूहरूले स्थानीयसँग १ करोड २५ लाख रुपियाँ ऋण लिएको बयान दिएको एसपी सिलवालले बताउनु भयो । उक्त बयान अनुसार थापा दम्पतीले काठमाडौँमा जग्गा किन्ने क्रममा ऋण लिएको र उनीहरूले ऋण तिर्न नसकेको एसपी सिलवालले इन्सेकलाई जानकारी दिनुभयो ।

एसपी सिलवालका अनुसार पीडित पक्षको उजुरीपछि प्रहरीले आरोपितलाई जिल्ला अदालतबाट सात दिनको म्याद थप गरी हिरासतमा राखेर अनुसन्धान सुरु गरेको जानकारी दिनुभयो ।

नबिनबाबु अधिकारी