समाचारहरू

लिमचुङबुङ गाउँपालिका-३ बाराहा पिप्लेकी २० वर्षीया निङमा याङजी शेर्पाको शङ्कास्पद मृत्यु भएको आरोपमा पीडित पक्षले प्रहरीमा उजुरी दिएको छ ।

पीडित पक्षको उजुरीका आधारमा प्रहरीले निङमाका २४ वर्षीय पति क्षेत्र भुजेललाई असोज २८ गते गिरफ्तार गरी अनुसन्धान सुरू गरेको छ ।

निङमाले आत्महत्या गरेको नभइ हत्या गरिएको आरोपमा पीडित पक्षले २४ वर्षीय पति क्षेत्र भुजेलविरूद्ध जिल्ला प्रहरी कार्यालयमा असोज २८ गते आत्महत्या दुरूत्साहन दिएको आरोपमा किटानी उजुरी दिएको छ ।

छोरीज्वाईँ दशैँको टीकाको दिन ०८१ असोज २६ गते माइत ससुराली आएको र असोज २७ गते निङमाले आत्महत्या गरेको घटना शङ्कास्पद भएकाले ज्वाईँ क्षेत्र भुजेलविरूद्ध जिल्ला प्रहरी कार्यालयमा आत्महत्या दुरूत्साहन दिएको आरोपमा किटानी उजुरी दिएको मृतकका बाबु गञ्जु शेर्पाले बताउनु भयो ।

दशैँको टीका लगाएर असोज २७ गते छोरीज्वाईँ घरफर्किएको र असोज २७ गते छोरीले आत्महत्या गरेको भन्ने घटना शङ्कास्पद भएको बाबु गञ्जु शेर्पाले बताउनु भयो ।

निङमाले झुण्डिएर आत्महत्या गरेको र आफूूले देख्ने बित्तिकै बचाउन सकिन्छ भनेर डोरी काटेको बयान प्रहरीमा आरोपित क्षेत्र भुजेलले दिएका कारण घटना शङ्कास्पद भएको जिल्ला प्रहरी कार्यालयका डिएसपी राजन चापागाईँले बताउनु भयो ।

प्रेम सम्बन्धमा रहेका निङ्मा र क्षेत्रबिच सामाजिक परम्परा अनुसार ०८१ जेठ १० बिवाह गराइ दिएको मृतकका बाबु गञ्जु शेर्पाले बताउनु भयो ।

ज्वाईँ वैदेशिक रोजगारीमा गएर केही समयअघि घर आएको र बेलाबेला छोरीसँग झगडा गर्ने गरेको छोरीले सुनाएको बाबु गञ्जु शेर्पाले बताउनु भयो ।

घटनाका आरोपितलाई गिरफ्तार गरी अनुसन्धान थालिएको र पोष्टमार्टम रिपोर्ट आएपछि मात्र हत्या वा आत्महत्या हो स्वतन्त्र पुष्टि हुने डिएसपी राजन चापागाईँले बताउनु भयो ।

शवको पोष्टमार्टम जिल्ला अस्पतालमा असोज २९ गते गरिएको छ ।

पीडित पक्षले असोज २९ गते शव बुझी लिमचुङबुङ गाउँपालिका-३ मा सद्गत गरेको छ ।

राकेश नेपाली