व्यास नगरपालिकामा एक महिना भित्र पुनः मतगणना गर्न उच्च अदालतको आदेश

  ०८१ जेठ २ गते

उच्च अदालत पोखराले तनहुँको व्यास नगरपालिकामा एक महिना भित्रमा पुनः मतगणना गर्न आदेश दिएको छ ।

२०७९ वैशाखमा भएको स्थानीय तहको निर्वाचनमा मेयरमा पराजित स्वतन्त्र उम्मेदवार दिपकराज जोशीले पुनः मतगणनाको माग गर्दै ०७९ जेठ १२ गते उच्च अदालत पोखरामा दिनुभएको मुद्दामा अदालतका न्यायाधीश राजनप्रसाद भट्टराई र निर्मला पौडेल भट्टराईको ०८१ जेठ १ गतेको इजलासले पुनः मतगणना गर्न आदेश दिएको उच्च अदालत पोखराका उपरजिष्ट्रार रामबहादुर थापाले बताउनु भयो ।

सो निर्वाचनमा नेपाली कांग्रेसका उम्मेदवार बैकुण्ठनाथ न्यौपाने २ सय ५२ मतान्तरले विजयी हुनु भएको थियो । न्यौपानेले १२ हजार ७८ र एमालेको समर्थनमा उम्मेदवार बन्नु भएका जोशीले ११ हजार ८ सय २६ मत पाउनु भएको थियो ।

जोशीले केही मतदान केन्द्रमा खसेको भन्दा बढी मत प्राप्त भएको, मत गणना गर्दा गडबडी गरेर आफूलाई हराएको भन्दै पुनः मतगणनाको माग गर्दै मुद्दा दर्ता गराउनुभएको थियो  ।

उच्च अदालतले रजिष्ट्रार अच्युत कुईकेलको संयोजनमा पुनः मतगणनाको लागि आवश्यक कर्मचारी उपलब्ध गराउन समेत आदेश दिएको उपरजिष्ट्रार थापाले बताउनु भयो ।


प्रकाशचन्द्र भट्टराई