समाचारहरू

‘ग’ श्रेणीको जिल्ला कारागारको व्यवस्थापनमा समस्या हुँदा कैदीबन्दीहरुले सास्ती खेप्नु परेको छ भने कारागार भवन जिर्ण अवस्थामा रहेकोले कैदीबन्दीहरुको सुरक्षाको चुनौती समेत बढ्दै गएको छ ।

२०३७ सालमा निर्माण गरिएको जिल्ला कारागार पुरानो भएर वर्षातमा चुहिने र हिउदमा हिउले अत्याधिक चिसो भएर कैदीबन्दीहरुले सास्ती खेप्नु परेको छ ।

२५ जना क्षमता भएको जीर्ण भवनमा ४५ जना कैदी र १७ जना थुनुवा गरी ६२ जनालाई राख्नु पर्दा व्यवस्थापनमा समस्य भइरहेको जिल्ला कारागारका जेलर हंसबहादुर बोहोराले बताउनु भयो ।  ।

पुरानो जीर्ण अवस्थामा रहेको कैदीबन्दी गृहमा सुरक्षाका लागि समेत चौनौती पूर्ण रहेको  जेलर बोहोराले बताउनु भयो ।

उहाँले भन्नु भयो– एक जना अहेबको दरबन्दी रहेकोमा त्यो पनि रिक्त छ । कैदीबन्दीको उपचारमा समेत समस्या हुने गरेको छ । कारागारमा दुई जना दिर्घरोगी छन । स्वास्थ्यकर्मी नहुँदा सामान्य  विरामी भएका कैदीबन्दीको उपचारका लागि जिल्ला अस्पताल लैजानु पर्ने भएकोले सुरक्षाको समेत चुनौती थपिएको छ ।

कैदीबन्दी राखिएको भवन जीर्ण हुर्दा चिसोले बिरामी हुन थालेको बन्दी जिवन बिताइ राख्नु भएका ओकेन्द सिंहले बताउनु भयो ।

उहाँले भन्नु भयो– ‘दमको बिरामी छु । नियमिति औषधि सेवन गर्नु पर्छ । कारागारमा स्वास्थ्यकर्मी पनि छैनन् । जीर्ण भवनमा क्षेमता भन्दा झण्डै दोब्बर बढी कैदीबन्दी राखिएको छ । कोठामा कोचिएर बस्नु पर्ने र शौचालयमा समेत लाइन बस्नु पर्ने बाध्यता छ ।’

जिल्ला कारागारमा आठ जना कर्मचारीको दरबन्दी रहेकोमा तीन जना कर्मचारी मात्रै कार्यरत रहेकोले व्यवस्थापनमा थप समस्या उत्पन्न भएको जेलर बोहराले बताउनु भयो ।

पदमबहादुर सिंह