वृद्धा महिलामाथि कुटपिट घटनाका आरोपित गिरफ्तार

  ०७९ जेठ १५ गते

छत्रेश्वरी गाउँपालिका–१० भाटभिटे निवासी ७० वर्षीया वृद्धा तुलसा बस्नेतलाई सोही गाउँपालिका–४ जयचौर निवासी २७ वर्षीय तेजेन्द्र वलीले जेठ १३ गते कुटपिट गरेका छन् ।

घटनाका आरोपित वलीलाई इलाका प्रहरी कार्यालय, दमाचौरले जेठ १३ गते नै गिरफ्तार गरेको छ ।

रोजगारीका लागि भारत गएका वली भारतबाट घर फर्किने क्रममा आफ्नै घरमा बसीरहेकी वृद्धालाई मन्दिरमा प्रयोग हुने घण्टले एक्कासी कुटपिट गरेको जिल्ला प्रहरी कार्यालय, सल्यानका डीएसपी सुमित खड्काले जानकारी दिनु भएको छ ।

डीएसपी खड्काका अनुसार घटना भएको थाहा पाए लगतै प्रहरी घटनास्थल पुगेर आरोपितलाई गिरफ्तार गरेको हो ।

टाउको र पिठ्युमा चोट लागेर घाइते भएकी वृद्धाको सल्यानको श्रीनगरमा प्रारम्भिक उपचार गरिएको र जेठ १३ गते राति थप उपचारका लागि नेपालगञ्ज लगिएको थियो । घाइतेको नेपालगञ्ज मेडिकल कलेजमा उपचार भइरहेको प्रहरीले जनाएको छ ।

घटनाका विषयमा थप अनुसन्धान भइरहेको र आरोपित हाल हिरासतमा रहेका प्रहरीले जनाएको छ ।


मिना बुढाथोकी