समाचारहरू

महाबौद्धस्थित वीर अस्पतालको पुरानो भवनको छतको पर्खाल भत्कँदा अस्पतालमा भएका चार जना बिरामी कुरुवा घाइते भएका छन् ।

वीर अस्पतालको पुरानो रातो भवनको बरण्डाको बाहिरी पर्खाल भत्कँदा तीन जना महिला र एक जना पुरुष घाइते भएका हुन् ।

छतको पर्खाल खसेर घाइते हुनेमा बिरामी आफन्त कुरेर बसेका बर्दियाकी २५ वर्षीया अंशु चौधरी, सप्तरीकी ४५ वर्षीया श्यामा देवी, धनुषाकी २५ वर्षीया रीना झा चौधरी र गुल्मीका ४५ वर्षीय धर्मेश्वर पन्थी हुन् ।

घाइतेहरू सबैको अवस्था सामान्य रहेको र राष्ट्रिय ट्रमा सेन्टरमा उपचार पश्चात डिस्चार्ज भएको ट्रमा सेन्टरका सामाजिक सेवा इकाई प्रमुख ऋतुराज अर्यालले जानकारी दिनुभयो ।

प्रमुख अर्यालका अनुसार अस्पतालको पुरानो भवन जिर्ण भएको र निरन्तर वर्षापछि छतको पर्खाल भत्किएर कुरुवा तथा आगन्तुकहरूलाई ओत लाग्न र बस्न बनाइएको छाना माथि खस्दा इट्टाका टुक्राहरूले छाना प्वाल परेर तल झरेपछि बिरामी कुरुवाहरू घाइते भएका हुन् ।

अस्पतालको भत्किएको पुरानो भवन २०३६ सालमा निर्माण भएको थियो । २०७२ सालको भुकम्पपछि अस्पतालको सुविधासम्पन्न नयाँ भवन बनेपनि जिर्ण रहेको पुरानो भवनको संरचना पनि प्रयोगमा ल्याउँदा दुर्घटनाको जोखिम बढेको हो ।

विमल पौडेल