समाचारहरू

हिल्लिहाङ गाउँपालिका-७ स्थित जङ्गलको ओडारमा वैशाख ४ गते विष्फोटक पदार्थ विष्फोट हुँदा स्थानीय १५ वर्षीया लक्ष्मी राई र १७ वर्षीय सुजन राई घाइते भएका छन् ।

बाख्रा चराउन गएको बेला ओडारमा आगो बालेपछि उक्त विष्फोटक पदार्थ विष्फोट भई उनीहरू घाइते भएका हुन् । पेट र गोडामा चोट लागेका घाइतेद्वयको वैशाख ४ गते जिल्ला अस्पताल पाँचथरमा प्रारम्भिक उपचार गरिएको थियो ।

सो अस्पतालको 'रेफर'पछि पीडितद्वयको उपचार झापा बिर्तामोडस्थित बि एण्ड सि अस्पतालमा उपचार भइहरेको छ । घटनास्थलमा टिनका टुक्राहरू फेला परेको जिल्ला प्रहरी कार्यालयका डिएसपी नकुल पोख्रेलले बताए ।

द्वन्द्वकालमा छाडिएको बम विष्फोट भएको हुन सक्ने आशङ्का गरिएको डिएसपी पोख्रेलले जानकारी दिए । नेपाललाई बारुदी सुरुङ मुक्त घोषणा गरिए पनि अझै द्वन्द्वकालमा छाडिएका विष्फोटक पदार्थ निष्कृय नपारिएका कारण यस्ता घटना दोहोरिने गरेका छन् ।

मङ्गल बेघा