विषयगत शिक्षकको अभावमा बहिरा कक्षा सञ्चालनमा समस्या

  ०७३ मङ्सिर १ गते

कर्णाली उच्च मावि अनामनगर जुम्लामा सञ्चालित विशेष शिक्षा अन्तर्गत बहिरा कक्षा सञ्चालनमा समस्या भएको छ । बहिरा कक्षा प्रभावकारी रूपमा सञ्चालनका लागि विषयगत र तालिम प्राप्त शिक्षकको अभाव भएपछि समस्या भएको हो ।

विद्यालयद्वारा कात्तिक ३० गते आयोजित विशेष शिक्षा प्रतिवेदन सार्वजनिकीकरण कार्यक्रममा सहभागी सरोकारवालाहरूले उक्त समस्या बताएका हुन् ।

नेपाल सरकारको अवधारणा अनुसार ०६१ सालदेखि अनामनगरमा बहिरा कक्षा सञ्चालन हुँदै आएको छ । हाल कक्षा १ देखि ७ सम्म साङ्केतिक भाषाका माध्यमद्वारा र कक्षा ८ देखि १० सम्म समाहित कक्षामा राखी अध्ययन अध्यापन कार्य सञ्चालन हुँदै आएकोमा समाहित कक्षामा अध्ययन गर्ने बहिरा विद्यार्थीको शैक्षिक गुणस्तर कायम हुन नसकेपछि समस्या बल्झिएको विद्यालयका प्रद्यानाध्यापक मिनराज शर्माले बताए । सबै कक्षामा जम्मा ३३ जना बहिरा विद्यार्थी रहेकोमा विषयगत शिक्षक अभावमा पाँच जना शिक्षकले सबै विषय अध्यापन गराउनु परेको विद्यालयले जनाएको छ ।

विद्यालयका प्रधानाध्यापक शर्माका अनुसार जिल्ला शिक्षा कार्यालयबाट प्रति विद्यार्थी मासिक ३ हजार रुपियाँका दरले हालसम्म ३० जना बराबरको छात्रवृत्ति र साङ्ग्रिला डेभलपमेण्ट एशोसिएसन ललितपुर र आइएनएफ जुम्लासँग सहकार्य गरी आवासीय बहिरा कक्षा सञ्चालन भइरहेको छ ।

विभिन्न चूनौतीसँग सामाना गर्दै विद्यालयले हाल २ जना राहात, १ जना निजी र २ जना साङ्ग्रिला र आइएनएफद्वारा सञ्चालित शिक्षकको भरमा बहिरा कक्षा सञ्चालन गर्नु परेको प्रधानाध्यापक शर्माले बताए । स्रोत साधानको अभावले अन्य जिल्लाबाट पढ्न आएका बहिरा बालबालिकालाई पठनपाठनको व्यवस्था पूर्ण रूपमा मिलाउन नसकिएकाले सरोकारवाला निकायलाई सहयोग गर्न विद्यालयले आग्रह गरेको छ ।

बहिरा कक्षा सञ्चालनका लागि विद्यालयमा कम्प्यूटर, ओड्ने ओछ्याउने कपडा, दराज, र्‍याक, निर्माणाधिन आवासीय भवनमा कक्षा कोठा व्यवस्थापनका लागि कार्पेट लगायतका सामाग्रीको तत्काल समस्या रहेको शिक्षक देवेन्द्र तिमिल्सिनाले बताए । बहिरा बालबालिकालाई कुनै ठूलो रोग लाग्दा उपचारका लागि बजेटको अभाव रहेकाले उपचारमा छुट गर्न कर्णाली स्वास्थ्य विज्ञान प्रतिष्ठानलाई आग्रह गर्ने विद्यालयले निर्णय गरेको छ ।


मानदत्त रावल