विशेषज्ञ डाक्टर नहुँदा जिल्ला अस्पतालको प्रसूति अप्रेशन सेवा बन्द

  ०८० साउन १७ गते

नेपालको संविधान २०७२, ले धारा ३५ मा स्वास्थ्यसम्बन्धी हकलाई मौलिक हकका रूपमा व्याख्या एवम् व्यवस्था गरेको छ ।

सोही धाराको उपधारा १ मा प्रत्येक नागरिकलाई राज्यबाट आधारभूत स्वास्थ्य सेवा निशुल्क प्राप्त गर्ने हक हुनेछ र कसैलाई पनि आकस्मिक स्वास्थ्य सेवाबाट वञ्चित गरिने छैन भन्ने व्यवस्था गरिएको छ ।

तर, जिल्ला अस्पताल फाप्लुमा विशेषज्ञ डाक्टर नहुँदा प्रसूति अप्रेशन सेवा बन्द गरिएको छ ।

जटिल प्रसूतिका लागि शल्यक्रिया सेवा सञ्चालन गरिएको भए पनि तालिम प्राप्त चिकित्सक नहुँदा ०८० साउन १ गतेदेखि सेवा बन्द गरिएको अस्पतालका निमित्त प्रमुख सानी शेर्पाले बताउनु भयो ।

अस्पतालमा १ वर्ष ६ महिनायता कार्यरत एमडीजीपी डाक्टर अजय चौधरी दूधकोशी सामुदायिक अस्पतालमा सरूवा भएसँगै अस्पतालको अप्रेशन सेवा बन्द गरिएको प्रमुख शेर्पाले बताउनु भयोे ।

अस्पतालमा तालिम प्राप्त चिकित्सक नहुँदा जटिल प्रसूति शल्यक्रिया सेवा लिन आएका स्वास्थ्यग्राहीलाई  ओखलढुङ्गा तथा काठमाण्डौँ रेफर गर्नु परेको निमित्त प्रमुख शेर्पाले बताउनु भयो ।

सेवा बन्द गरिएयता १५ दिनको अवधिमा तीन जना स्वास्थ्य सेवाग्राहीलाई जिल्ला बाहिर रेफर गरिएको छ ।

एमडीजीपी डाक्टरको व्यवस्थापन गरिदिन आग्रह गर्दे स्वास्थ्य मन्त्रालय र कोशी प्रदेशको स्वास्थ्य निर्देशनालयमा पत्र पठाएको प्रमुख सानी शेर्पाले बताउनु भयो ।

पत्रचार गरिएका निकायले चाँडो डाक्टरको व्यवस्था गरिदिए अप्रेशन सेवा सुचारू गर्ने अस्पतालले जनाएको छ ।


अञ्जु कार्की