समाचारहरू

स्थानीय तह निर्वाचन-२०७४ अन्तर्गत भक्तपुरको तीन नगरपालिकामा मतगणना जारी रहेको छ भने विवादित चाँगुनारायण नगरपालिकामा पुनः मतदान हुने भएको छ ।

चाँगुनारायण नगरपालिका-६ नं वडा कार्यालय मतदान केन्द्रमा निर्वाचन आयोगले पुनः मतदान गर्ने भएको हो ।

मतदानका क्रममा नेपाल मजदूर किसान पार्टीको चुनाव चिन्ह 'मादल' नभएको मतपत्र वितरण गरी २२ जनाले मतदान गरेको विषयमा विवाद चर्किएपछि निर्वाचन आयोगले विवादित केन्द्रमा पुनः मतदान गर्न परिपत्र गरेको जनाइएको छ ।

नवलपरासीका लागि तयार पारेको मतपत्र चाँगुनारायणमा वितरण गरेपछि नेपाल मजदूर किसान पार्टीले उक्त २२ मत बदर गर्न माग गर्दै मतगणना गर्न नदिए पछि जेठ १ गते मतगणना हुन सकेको थिएन ।

जेठ १ गते चाँगुनारायण नगरपालिकाको सर्वदलीय संयन्त्रले विवादित विषयलाई टुङ्गो लगाउन निर्वाचन आयोगलाई पत्र पठाएपछि आयोगले विवादित केन्द्रमा पुनः मतदान गर्ने परिपत्र गरेको निर्वाचन अधिकृत रिञ्जा डङ्गोलले जानकारी दिइन् ।

कुन दिन मतदान गर्ने भन्ने बारेमा जेठ २ गते हुने सर्वदलीय छलफलबाट टुङगो लगाइने उनले बताइन् । चाँगुनारायण नगरपालिका-६ को बुथ 'ख' मा कूल ८ सय ७ जना मतदाता रहेका छन् ।

सविना केसी