समाचारहरू

हुम्ला जिल्लाका लागि नेपाल सरकारले सहुलियत दरमा उपलब्ध गराएको नुन सुर्खेत र जुम्लामा अलपत्र परेपछि स्थानीयबासी नुन खानबाट वञ्चित भएका छन् । ठेकेदारले समयमै हवाई ढुवानी गर्न नसकेपछि साल्ट ट्रेडिङ्ग कर्पोरेसनबाट ठेक्कामा लिएको नुन सुर्खेत र जुम्लाको विमानस्थलमा अलपत्र परेको हो ।

नुन समयमै ढुवानी गर्न नसक्दा विमानस्थलमा सडेको पाइएको छ । विमानस्थल बाहिर रहेका नुनका बोरा च्यातिएर घाम, पानीले गर्दा सडेको अवस्थामा रहेको छ । आर्थिक वर्ष२०७३/०७४ मा ढुवानी गरिनु पर्ने नुन जिल्लामा नपुग्दै काम नलाग्ने अवस्थामा पुग्नु ठेकेदारको लापरवाहीले भएको स्थानीयाबासी गणेश बोहोराले आरोप लगाए ।

निर कार्गो सर्भिसका सञ्चालक तेजबहादुर महतले हुम्लाका लागि ४ हजार क्वीन्टल नुन, प्रति क्वीन्टल ८ हजार १५ रुपियाँ ठेक्कामा लिएको तर समयमा ढुवानी गर्न नसक्दा बेवारिसे अवस्थामा रहेको पाइएको छ । ठेकेदारले अहिलेसम्म २ हजार क्वीन्टल नुन मात्र जिल्लामा ढुवानी गरेको साल्ट ट्रेडिङ्ग कर्पोरेसन हुम्लाका प्रमुख राजबहादुर लामाले जानकारी दिए ।

नेपाल सरकारले हुम्ला लगायत अन्य दुर्गम जिल्लामा सहुलियत दरमा भानु ब्राण्डको नुन बिक्री वितरण गर्दै आएको छ । साल्ट ट्रेडिङ्ग कर्पोरेसनले हुम्लामा प्रति किलो नुन नौ रुपैयाँमा बिक्री गर्ने गरेको छ । सहुलियत दरमा उपलब्ध हुने नुन हुम्लाका श्रीनगर, र्सर्केगाड, हिल्सा र सिमिकोटबाट बिक्री वितरण हुने गरेको छ ।

२ हजार क्वीन्टल नुन ढुवानी भइसकेको र बाँकी २ हजार क्वीन्टललाई ल्याब परीक्षण गरी फिर्ता लैजान कर्पोरेसन तयार भएको नेपाल साल्ट ट्रेडिङ्ग, क्षेत्रीय कार्यालय, नेपालगञ्जका प्रमुख मनोज चौधरीले जानकारी दिएका छन् ।

ठेकेदारले कार्यालयबाट नुन किनेर लगिसकेको तर हुम्लामा पुगेपछि मात्र सोको ढुवानी दाबी गर्न सक्ने प्रावधान भएको चौधरीले बताए । आयोडिनयुक्त नुनको समयावधि दुई वर्षको हुने र आयोडिन उडेर नगएमा यसको पुनः प्रयोग गर्न मिल्नेसमेत चौधरीको भनाइ छ ।

नेपाल सरकारले हरेक वर्ष हवाई स्थलमार्गबाट नुनको ढुवानी गर्ने गरेको भएतापनि नुनका ठेकेदारले बेलैमा ढुवानी गर्न नसक्दा उपभोक्तालाई समस्या पर्ने गरेको छ । ठेकेदारले आफ्नो फाइदा अनुकूल काम गर्ने गरेको र सर्वसाधरणलाई नुनको जहिले पनि अभाव हुने गरेको स्थानीयबासीहरूको गुनासो रहेको छ ।

हुम्लाको नुन जुम्ला र नेपालगञ्जमा बेवारिसे हुनु तर हुम्लीले चाहेको नुन प्राप्त गर्न नसक्नु दुर्भाग्य रहेको चङ्खेली गाउँपालिका-१ का तिलक बोहोराले बताए ।

सरकारले दिने सहुलियत दरको नुन समयमै नपाउँदा १८ दिन लगाएर भेडाबाख्रामा बोकाएर चीनको ताक्लाकोट जान बाध्य हुने स्थानीयबासीको भनाइ छ । सर्केगाड गाउँपालिका-८ का कलबहादुर ऐडी भन्छन्-'भेडा बाख्रा, बस्तुभाउ पालेको छु । नुन धेरै चाहिन्छ । तर, नजिक रहेको वितरण केन्द्र र्सर्केगाडमा कहिले नुन आउँछ र वितरण हुन्छ थाहा हुँदैन ।'

नन्द सिंह