समाचारहरू

नेत्रविक्रम चन्द 'विप्लव' नेतृत्वको नेपाल कम्युनिष्ट पार्टी अन्तर्गतको जनपरिषद नेपाल जिल्ला समिति प्यूठानले झिमरुक र नौबहिनी गाउँपालिका अध्यक्षलाई पत्रमार्फत राजीनामा दिन धम्की दिएका छन् । गाउँपालिका अध्यक्षको राजीनामा माग गर्दै राजीनामा नदिए जनकारबाही गर्ने पत्रमा उल्लेख गरिएको छ ।

जनपरिषद नेपाल जिल्ला समिति प्यूठानका प्रमुख राजेन्द्र रावत क्षेत्रीद्वारा हस्ताक्षरित उक्त पत्र झिमरुक गाउँपालिका अध्यक्ष तिलकबहादुर जिसीले जेठ १९ गते प्राप्त भएको जानकारी दिए । प्राप्त पत्रको विषयमा जिल्ला प्रशासन कार्यालयलाई जेठ २० गते जानकारी गराएको समेत उनले बताए ।

यसैगरी नौबहिनी गाउँपालिकाका अध्यक्ष शिवराज रिजालले आफूलाई पनि धम्कीपूर्ण पत्र आएको जानकारी दिए । उनले राजीनामा कहाँ गएर कसलाई गर्ने भन्ने कुनै उल्लेख नभएको समेत बताए । धम्कीपूर्ण पत्रका विषयमा प्रशासनलाई जानकारी दिइसकिएको उनको भनाई छ ।

प्रमुख जिल्ला अधिकारी डा.कृष्णबहादुर घिमिरेले जिल्लाका दुई ओटा गाउँपालिकामा पत्र पुगेको जानकारी दिए । उक्त विषयमा बुझ्ने काम भइरहेको प्रजिअ घिमिरेले बताए ।

रविन्द्र पाण्डे