समाचारहरू

नेत्रविक्रम चन्द (विप्लव) नेतृत्वको नेपाल कम्युनिष्ट पार्टीले जेठ १३ गते आह्वान गरेको नेपाल बन्दको दिन अपरिचित पक्षबाट थाहा नगरपालिका-१ कुन्छाल र हेटौँडा उपमहानगरपालिका-१ चौकीटोलमा गरी दुई ओटा ट्रकमा आगजनी गरिएको छ ।

त्रिभुवन राजपथ अन्तर्गत थाहा नगरपालिका-१ कुन्छाल नजिकै हेटौँडातर्फ आउँदै गरेको ना ६ ख ८००७ नम्बरको खाली आईचर ट्रकमा जेठ १३ गते बिहान ४ बजे आगजनी गरिएको हो ।

हेटौँडाको चौकीटोलमा प्रहरी चौकी नजिकै ना ७ ख ९४९३ नम्बरको रोकिराखेको मिनी ट्रकमा समेत बिहान करिब २ बजे आगजनी गरिएको जिल्ला प्रहरी कार्यालय मकवानपुरका डिएसपी यज्ञप्रसाद भटराईले जानकारी दिए । आगजनीबाट दुवै ट्रकमा क्षति पुगेको भट्टराईले बताए ।

यसैगरी १३ गते बिहान १ बजेको समयमा हेटौँडाको बुद्धचोक नजिक प्रेसरकुकर बम समेत भेटिएको र उक्त बमलाई नेपाली सेनाको बम डिस्पोजल टोलीले बिहान ५ बजे डिस्पोज गरेको प्रहरीले जनाएको छ ।

हेटौँडा उपमहानगरपालिका-९ पशुपतिनगरमा खतरा लेखेर छाडेको अवस्थामा नक्कली बम भेटिएको प्रहरीले जनाएको छ ।

सो पार्टीले आह्वान गरेको नेपल बन्दको कारण हेटौँडामा जनजीवन प्रभावित बनेको छ । हेटौँडा बजार भएर चल्ने अधिकांश सवारीसाधन चलेका छैनन् भने उद्योग तथा शैक्षिक संस्थाहरूसमेत बन्द रहेका छन् ।

पुष्पराज अधिकारी