समाचारहरू

शिक्षा समन्वय इकाइ सोलुखुम्बुका सव–इन्जिनियर २९ वर्षीय पवनकुमार यादवले आफूलाई नेत्र विक्रम चन्द(विप्लव) नेतृत्वका कार्यकर्ताले मोसो र जुत्ताको माला लगाएर दुर्व्यवहार गरेको आरोप लगाउनु भएको छ ।

मास्क लगाएर नचिनिने भएर कार्यालयमा आएका १० जना युवाहरूले माघ १७ गते नाराबाजीसहित आफूलाई हातपात गरेको पीडित यादवले बताउनु भयो ।

सप्तरी स्थायी घर शिक्षा समन्वय इकाइ सोलुखुम्बुमा कार्यरत यादवले महाकुलुङ गाउँपालिकामा रहेका सरकारी विद्यालयको भवन क्रममा भ्रष्टाचार गरेको आरोपमा कारबाही गरिएको अखिल नेपाल राष्ट्रिय स्वतन्त्र विद्यार्थी युनियन (क्रान्तिकारी) ले शिक्षा समन्वय इकाइको  कार्यालय मुख्यद्वारमा प्रेस विज्ञप्ति समेत टाँस गरेर कारबाही गरिनुको कारण उल्लेख गरिएको छ ।

अखिल नेपाल राष्ट्रिय स्वतन्त्र विद्यार्थी युनियन (क्रान्तिकारी) का संयोजक एकराज राईद्वारा हस्ताक्षरित विज्ञप्तिमा शिक्षा समन्वय इकाइका सव–इन्जिनियरद्वय पवनकुमार यादव र नविनकुमार सिंहले महाकुलुङ गाउँपालिका क्षेत्रका विद्यालय भवनहरू निर्माण गर्दा भ्रष्टाचार गरेको आरोप लगाइएको छ ।

कारबाही गरिनुका कारणमा महाकुलुङ गाउँपालिकाको कैलाश आधारभूत विद्यालयबाट १ लाख ९० हजार रुपियाँ, पेल्माङ माध्यमिक विद्यालयबाट ५० हजार रुपियाँ, बाखोर र चेपेल आधारभूत विद्यालयबाट ३५-३५ हजार रुपियाँ र खिरौले आधारभूत विद्यालयबाट ७५ हजार रुपियाँ कमिसन लिएको र रकम फिर्ता गर्न आग्रह गरिएपनि अटेर गरिएको विज्ञप्तिमा उल्लेख छ ।

पीडितले आफूलाई १० जना मास्क लगाएर आएकाहरूले कार्यलयभित्रै मोसो र जुत्ताको माला लगाइ दिएर दुर्व्यहावर गरेको भन्दै माघ १७ गते जिल्ला प्रहरीमा उजुरी दिएको जिल्ला प्रहरी कार्यालयका डिएसपी ऋषिराज ढकालले इन्सेक प्रतिनिधिसँगको फोन सम्पर्कमा बताउनु भयो । घटनामा संलग्नहरूको खोजी भइरहेको इन्स्पेक्टर ढकालले बताउनु भयो ।

 सोलुखुम्बुका प्रमुख जिल्ला अधिकारी गणेशविक्रम शाहीले कानुनी कारबाही गर्ने प्रशस्त आधार हुँदा हुँदै हातपात तथा अभद्र व्यवहार गरिनु गलत भएकाले कडाभन्दा कडा कारबाही गरिने बताउनु भयो । सव–इन्जिनियर यादवले समेत कमजोरी गरेको पाइएमा कानुन अनुसार कारबाही गरिने सिडिओ शाहीको भनाइ छ ।

भोजराज कार्की