समाचारहरू

जिल्लाका अधिकांश गाउँहरुमा विद्युत सेवा सञ्चालनमा नआएपछि स्थानीयहरुले सास्ती खेप्नु परेको गुनासो गर्नु भएको छ ।

विद्युत सेवा नपाउँदा आफूहरुले अझैं पनि टुक्की, सोलार र सल्लाको झोरो बालेर रात बिताउन बाध्य हुनु परेको नवदुर्गा गाउँपालिका–१ कोटेली र वडा नम्बर ५ चामा गाउँका स्थानीयहरुले गुनासो गर्नु भएको हो ।

अहिले पनि  जिल्लाका २० प्रतिशत नागरिकहरुको विद्युत सेवामा पहुँच नभएको तथ्याङ्क नेपाल विद्युत प्राधिकरण, डडेल्धुरा शाखामा तथ्यांक रहेको छ ।

अहिलेसम्म पनि जिल्लाका सात ओटै स्थानीय तहका दुर्गम गाउँहरुमा बिजुली पुग्न सकेको छैन् । कतिपय ठाउँमा विजुलीका पोल पुगे पनि तार तान्न बाँकी रहेको छ ।

नवदुर्गा गाउँपालिका–१ कोटेली र वडा नम्बर ५ चामा गाउँमा पोल भुइँमा छरिएका छन् भने केही पोल पुरिदै गइरहेका छन् ।

चार वर्ष अघि गाउँमा पोल गाडिदा गाउँ झिलिमिलि पार्ने र दैनिकी सहज बनाउने सपना साँचेर बसेका गाउँलेहरू टुकी र सल्लाको झोरो बालेर रात बिताउन बाध्य रहेको नवदुर्गा गाउँपालिका–१ का स्थानीय सारदादेवी बुढाऐरले दुखेसो पोख्नु भयो ।

उहाँले भन्नु भयो– ‘यहाँका ग्रामिण भेगमा पोल त पु¥याइएका छन ्। तर, बिजुली नहुँदा स्थानीय अन्धकार मै रुमलिन बाध्य छन् । कतिपयले वैकल्पिक ऊर्जाका रूपमा सोलार जोडे पनि अझै अधिकांश स्थानीय टुकी तथा झोरो बालेर कष्टकर जिवन विताउन बाध्य छन् ।’

स्थानीय तह, प्रदेश र प्रतिनिधिसभाको निर्वाचनमा नेताहरूबाट बिजुलीको आश्वासन आउने गरे पनि जितेर गइसकेपछि प्रतिवद्धता अनुसार काम नगरि दिदा आफूहरुले सास्ती खेप्नु परेको नवदुर्गा गाउँपालिकाका स्थानीय गणेशबहादुर बुढाऐरले गुनासो गर्नु भयो ।

‘घाम लागेको दिन मात्र सोलार बल्छ । घाम लागेन् भने समस्या हुन्छ । २१ औँ शताब्दीमा समेत झोरो बालेर बस्नु परेको छ,’ भागेश्वर गाउँपालिका–५ सिराडका  सुरेन्द्र कामीले दुखेसो पोख्नु भयो ।

विद्युत सेवा नहुँदा बालबालिकाहरुको पठनपाठनमा समेत समस्या हुने गरेको बिकले गुनासो गर्नु भयो ।

बालबालिकाहरु दिउँसाको समयमा विद्यालय जाने गरेको भए पनि राति र विहानको समयमा पढ्न समस्या हुने गरेको स्थानीय शर्भादत्त भट्टले गुनसो गर्नु भयो ।

उहाँले भन्नु भयो– ‘पहुँचका भारमा विद्युत विस्तारको ठेक्का लिने तर समयमै काम सम्पन्न नगरिने दिने कारणले पनि हामीले दुःख पाएका छौँ । ठेकेदारले तोकिएको समयमा विद्युत लाइन विस्तार र पोल गाड्ने काम नगर्दा विद्युत सेवाबाट वञ्चित हुनु परेको छ ।’

नेपाल विद्युत प्राधिकरण, डडेल्धुरा शाखाका प्रमुख रमेश अवस्थीले तार अभावका कारण विद्युतीकरण गर्न समस्या भएको र यसका लागि पहल भइरहेको बताउनु भयो ।

शेरबहादुर भण्डारी