विद्युत आयोजनाका मजदुरले काम गरेको ६ महिना बितिसक्दा पनि ज्याला पाएनन्

  ०७७ असोज २१ गते

सिस्ने गाउँपालिका–८ मा निर्माणाधीन जामाखोला लघु जलविद्युत आयोजनामा काम गरेका मजदूरले ६ बितिसक्दा पनि  ज्याला पाएका छैनन् ।

सिस्ने गाउँपालिका –८ की चन्द्रकला परियारले उक्त विद्युत आयोजनामा ०७७ वैशाखमा १८ दिन काम गर्नु भयो । उहाँले काम गरेको ९ हजार रुपियाँ अहिलेसम्म नपाएको दुखेसो पोख्नु भयो । सोही ठाउँकै झुपलाल घर्ती, कुँवेर घर्ती, नौली पुन लगायत ३५ जना मजदुरको  पीडा पनि चन्द्रकलाको भन्दा फरक छैन । उहाँहरू भन्नु हुन्छ–‘मामको जोहो गर्न काम गरियो, त्यही कामको दाम पाइएन ।’ घर खर्च गुजारा चलाउन भनी विद्युत् आयोजनाको विद्युत गृह निर्माणको  कामको ज्याला नपाउँदा उहाँहरू मर्कामा परेका छन् ।

विद्युत आयोजना निर्माण समितिका सचिव विष्णु सार्कीले भने लागत अनुमान अनुसार मजदुरलाई काममा लगाए पनि भुक्तानी  कम भएकाले काम गरेको ज्याला दिन नसकिएको बताउनु भयो । सचिव सार्कीका अनुसार पहिले जिल्ला समन्वय समिति रुकुम पूर्वले १७ लाख र सिस्ने गाउँपालिकाले ४० लाख गरी जम्मा ५७ लाख रुपियाँ विद्युत् आयोजनाका लागि उपलब्ध गराउने भनिएको थियो ।

समितिले पनि त्यसैअनुसार लागत अनुमान तयार गरेको थियो तर पछि जिससबाट भुक्तानी नभएको र गाउँपालिकाबाट पनि विद्युत गृह निर्माणका लागि तयार पारिएको ठाउँमा पहिरो झरेपछि २१ लाख एक हजार मात्र भुक्तानी दिएकाले मजदुरलाई ज्याला दिन नसकिएको सचिव सार्कीले बताउनु भयो ।

जिससका प्रमुख गजेन्द्रबहादुर ओलीले भने समितिलाई रकम उपलब्ध गराउने विषयमा आफुहरूसँग कुनै सम्झौता नभएको बताउनुभयो । त्यस विषयमा आफूलाई कुनै जानकारी समेत नभएको उहाँको भनाइ छ ।


जयमान बुढा मगर