समाचारहरू

सर्केगाड गाउँपालिका–२ स्थित कुन्नकोट आधारभूत विद्यालय र सर्केगाड गाउँपालिका–३, उनापानीस्थित देवकोटा आधारभूत विद्यालयका विद्यार्थीहरू धमाधम बिरामी भएर विद्यालय बन्द हुँदा पठनपाठनमा प्रभावित भएको छ ।

गत भदौ २५ गतेदेखि हालसम्म गरेर दैनिक दिन दुई ओटा विद्यालय गरेर ६ जना विद्यार्थीहरू विद्यालय सञ्चालनको समयमा बिरामी पर्ने गरेको कुन्नकोट आधारभूत विद्यालयका प्रधानाध्यापक नवराज फडेराले बताउनु भयो । केही दिनदेखि पठनपाठन गर्ने समयमै बिरामी हुन थालेपछि पठनपाठनमा प्रभावित भएको प्रधानाध्यापक फडेराको भनाइ छ ।

सो विद्यालयका छात्राहरू बिरामी हुन थालेपछि छात्रहरू झाँक्रीको भेषमा पतुर्ने (नाच्ने) गर्ने गरेको उहाँले बताउनु भयो । विद्यालयमा विद्यार्थी बिरामी हुन थालेपछि असोज १ गतेदेखि विद्यालय बन्द गर्नु परेको उहाँले बताउनु भयो । त्यस्तै उनापानीको देवकोटा आधारभूत विद्यालयका विद्यार्थी पनि बिरामी हुने गरेपछि असोज २ गतेदेखि विद्यालय बन्द गरिएको फडेराले बताउनु भयो । विद्यार्थी के कति कारणले बिरामी हुने गरेका हुन् त्यो आफूहरूलाई थाहा नभएको विद्यालय प्रशासनले जनाएको छ ।

प्राय जसो विद्यार्थी बिरामी हुन थालेपछि उनीहरूको पठनपाठन प्रभावित हुनुका साथै विद्यालयलाई पनि समस्या हुने गरेको छ । सुरुमा एक दुई छात्रामा काँप्ने, रुने कराउने र चिच्याउने गर्नुका साथै शरीर बाँउडिने समस्या देखापरेपछि पछि अधिकांश विद्यार्थीमा यो समस्या देखिने गरेको प्रधानाध्यापक फडेराले उल्लेख गर्नुभयो ।

के कति कारणले विद्यार्थी बिरामी हुने गरेका हुन् कसैलाई थाहा नभएको उहाँको भनाइ छ । विद्यार्थी अचानक बिरामी हुन थालेपछि स्वास्थ्य सेवा कार्यालय हुम्ला, गाउँपालिकाको स्वास्थ्य शाखामा विद्यार्थीको उपचारका लागि मनोचिकित्सकको चाँडो व्यवस्था गर्न पत्राचार गरेको प्रधानाध्यापक फडेराले जानकारी दिनुभयो । हुम्लामा यो समस्या विद्यार्थीमा दोस्रो पटक देखिएको हो । गत वर्ष सर्केगाड गाउँपालिका केन्द्र हिमज्योति माधयामिक विद्यालयका विद्यार्थीमा समेत यो समस्या देखिएको थियो ।

नन्द सिंह