समाचारहरू

थलारा गाउँपालिका–२ बगाडाको खापरदेव आधारभूत विद्यालयको छाना हावाहुरीले उडाएपनि मर्मतसम्भार हुन नसक्दा विद्यार्थीहरुको पठनपाठन प्रभावित भएको छ ।

असार ३० गते आएको हावाहुरीले विद्यालय भवनको छाना उडाउनुको साथै विद्यालय भवनको पर्खालमा समेत क्षति हुँदा विद्यार्थीहरूको दैनिक पठनपाठनमा समस्या भएको हो ।

हावाहुरीले विद्यालयको छाना उडाउनुको साथै पर्खाल भत्काइ दिएपछि पठनपाठन अवरुद्ध हुँदै आएको प्रधानध्यापक कृपाराम जोशीले बताउनु भयो ।

भवनको छाना र पर्खाल निमार्णका लागि पहल गरी दिन वडा कार्यालय र गाउँपालिकामा लिखित निवेदन गरिएको भएपनि हालसम्म कुनै सुनवाइ नभएको प्रधानाध्यापक जोशीको भनाइ छ ।

असार ३० गतेदेखि खुल्ला चौरमा बसेर पढ्नु परेको र दिनभरी चल्ने हावाका कारण किताबकापी समेत हावाले उडाइदिँदा पढाइमा बाधा भएको कक्षा ७ मा अध्यनरत समिर खातीले गुनासो गर्नु भयो ।

खापरदेव आधारभूत विद्यालयमा कक्षा ५ मा अध्यनरत कल्पना विष्टले हावाहुरीका कारण विद्यालयको छाना उडाउँदा पानी परेको दिन विद्यालय बन्द हुने भएकोले पठनपाठनमा समस्या भएको दुखेसो पोख्नु भयो ।

भवन निमार्णका लागि वडा कार्यालयमा बजेट नभएको कारण गाउँपालिकालाई अनुरोध गरिएको थलारा गाउँपालिका–२ का अध्यक्ष रविन्द्र खातीले बताउनु भयो ।

आठ कक्षासम्म पढाई हुने यस विद्यालयमा २ सय ६८ जना विद्यार्थीहरू अध्ययनरत छन् ।

सत्यराज सिंह