विद्यालय बाहिर रहेका बालबालिकालाई विद्यालयको पहुँचमा ल्याउनुपर्नेमा जोड

  ०७३ कात्तिक २७ गते

अपाङ्गता, नाजुक आर्थिक अवस्था र दुर्गम भेगका १ दशमलब ५ प्रतिशत बालबालिका अझै पनि विद्यालय शिक्षाबाट वञ्चित भएको भन्दै उनीहरूलाई विद्यालयको पहुँचसम्म ल्याउने पर्नेमा एक कार्यक्रमका सहभागीले जोड दिएका छन् ।

'बुवा आमा नभएका र नाजुक आर्थिक स्थिति भएका विद्यार्थीको स्थिति हेर्दा निकै नाजुक छ ।'-सरस्वती उमावि आहालेका प्रध्यानाध्यापक पुरूषोत्तमबावु भट्टराइले भने-'कति अपाङ्गता भएका, गरिबी र दुर्गम क्षेत्रका बालबालिका विद्यालय बाहिर छन् उनीहरूको तथ्याङ्क सङ्कलन गरेर विद्यालय भित्र्याउन सक्नुपर्छ ।'

गोरखा नपा-१ को महेन्द्रज्योति उच्च माध्यमिक विद्यालयमा भएको कार्यक्रममा बोल्ने वक्ताहरूले अपाङ्गता भएका बालबालिकाहरूको वृत्ति विकासका लागि कतैबाट पनि पहल हुन नसकेको भन्दै उनीहरूले अब पहल गर्ने सङ्कल्प लिएका छन् ।

'अपाङ्गता र गरिबीका कारण विद्यालय बाहिर रहेकाहरूको खोजी गर्नुपर्छ ।'-मनकामना बहिरा माध्यमिक विद्यालयका अध्यक्ष खडानन्द रेग्मीले भने ।

अपाङ्गता भएका बालबालिकाको सजिलोका लागि विभिन्न विद्यालयमा आवासीय सुविधासहित विद्यार्थीलाई पठन पाठनको व्यवस्था मिलाइएको गोरखाका जिल्ला शिक्षा अधिकारी दिपेन्द्र सुवेदीले जानकारी दिए । 'शिक्षा क्षेत्र राज्यको धेरै लगानी भएको क्षेत्र हो । भिन्न क्षमता भएकाहरूलाई पनि शिक्षाको पँहुचमा ल्याउन हामीले पहल गरिरहेका छौँ ।'- सुवेदीले भने ।


हरिराम उप्रेती