समाचारहरू

शुक्लागण्डकी नपा-४ स्थित पञ्चमुनी माविको पठनपाठन बन्द गरी विद्यालय प्राङ्गणमा महोत्सव आयोजना गरिएको छ ।

तनहुँ उद्योग वाणिज्य सङ्घले पुस ९ गतेदेखि विद्यालयको चौरमा महोत्सव आयोजना गरेपछि विद्यालय प्रशासनले १० दिनको लागि विद्यालय विदा गरेको हो ।

तनहुँ उद्योग वाणिज्य सङ्घका अनुसार महोत्सव पुस १९ गतेसम्म चल्ने छ । विद्यालय पुस २० गतेदेखि सञ्चालन हुने विद्यालय प्रशासनले जनाएको छ ।

विद्यालयका प्रधानाध्यापक ध्रुवकुमार मल्लले महोत्सवको कारण पठनपाठनमा अवरोध हुने भएपछि विद्यालय बन्द गरिएको बताए ।

विद्यालय व्यवस्थापन समितिको बैठकले विद्यालयको चौरमा महोत्सव आयोजना गर्न दिने निर्णय गरेपछि पठनपाठन बन्द गरिएको उनले बताए । आगामी पुस २४ गते देखि विद्यालयमा तेश्रो त्रैमासिक परीक्षा सञ्चालन हुने शैक्षिक क्यालेण्डरमा उल्लेख छ ।

प्रधानाध्यापक मल्लले यो विदालाई जाडो विदाको रूपमा स्वीकृत गरिने बताए । महोत्सवको आम्दानीको केही प्रतिशत विद्यालयलाई दिने सहमति भएपछि विद्यालय व्यवस्थापन समितिले चौरमा महोत्सव गर्न दिने निर्णय गरेको थियो ।

शुक्लागण्डकी नगरपालिकाका शिक्षा शाखाका प्रमुख नेपालहरी रानाभाटले विव्यस र महोत्सवको आयोजक बिचमा पहिले नै सहमति भएर महोत्सवको लागि विद्यालयको चौर उपलब्ध गराएको जानकारी पाएको बताए । विद्यालय बन्दको बारेमा विद्यालयका प्रधानाध्यापकलाई बोलाएर जबाफ मागिसेको उनले बताए ।

प्रकाशचन्द्र भट्टराई