विद्यालय भवन पुनर्निर्माण नहुँदा जोखिमपूर्ण अवस्थामा पठनपाठन सुचारु

दुहुँ गाउँपालिका–२ स्थित दह आधारभूत विद्यालय भवनको पुनर्निर्माण हुन नसकेपछि एक वर्षदेखि जोखिमपूर्ण अवस्थामा पठनपाठन भइरहेको छ ।

गत वर्षको भदौ दोस्रो साता आएको बाढीपहिरोका कारण विद्यालयको दुई ओटा पर्खाल र खेल मैदान बाढीपहिरोले बगाउनुको साथै कटना गरिएको भएपनि एक वर्ष वितिसक्दा समेत पुनर्निर्माण तथ मर्मत हुन नसकेपछि बालबालिकाहरु जोखम मोलेरै अध्ययन गरी रहेका हुन् ।

शिशु कक्षादेखि पाँच कक्षासम्म पढाई हुने यस विद्यालयमा बाढिपहिरोका कारण विद्यालयको पर्खाल भत्किनुकौ साथै विद्यालयको भवनको आधा भत्किएको छ । विद्यालयमा खानेपानी र शौचालयको सुविधा पनि छैन् ।

शौचालय नहुँदा विद्यार्थी र शिक्षकहरुले खोला गएर शौच गर्नु पर्ने बाध्यता रहेको विद्यालयका प्रधानाध्यापक जंगबहादुर बमले बताउनु भयो ।

उहाँले भन्नु भयो– ‘भवनको वरपर पहिरो आएको छ । भवन मात्रै बचेको छ । भवनको छेउहरु भत्किएका छन् । अहिले पनि जोखिम मोलेर भत्कीएको भवनमा नै विद्यार्थीलाई राखेर पढाउनु पर्ने बाध्यता छ ।’

photo20220620darchual (2)

विद्यालयमा हाल ७७ जना विद्यार्थी अध्ययनरत छन् । “अघिल्लो शैक्षिक सत्रमा १ सय २० जना बढि विद्यार्थी भर्ना हुन्थे,” प्रधानाध्यापक बमले भन्नु भयो, “बाढीपहिरोपछि नरुली र बत्थोलीबाट आउने विद्यार्थी घटे ।” खोलामा बाटो नभएपछि दुई गाउँका विद्यार्थी आउन पाएनन् । बाटो घाटो अझै बनेको छैन् । बाटो अभावमा विद्यालयसम्म आउन पनि निकै जोखिम छ ।

बाढी पहिरोका कारण विद्यालयको खेल मैदान बचेको छैन् । तलपट्टी चट्टान लागेको कारण विद्यालय तत्तकालै भत्किने अवस्था नभए पनि खेल मैदान नहुँदा विद्यार्थीको पठनपाठनमा निकै समस्या भएको स्थानीय लोकेन्द्र बमले बताउनु भयो ।

उहाँले भन्नु भयो–‘विद्यालयको वैकल्पिक व्यवस्थापन हुनु जरुरी देखिएको छ । अहिले दुई गाउँका विद्यार्थी विद्यालयमा आउन सकेका छैनन् । भवन विस्तारको लागि जमिन छैन् । विद्यालयको खेल मैदान भत्किएको छ । विद्यालय मर्ज गर्नु बाहेकको विकल्प छैन् ।’

दुहुँ गाउँपालिका वडा नम्बर २ का अध्यक्ष गोविन्दसिह डडालले विद्यालय स्थानान्तरण गर्दा विद्यार्थीलाई समस्या हुने भएको विद्यालय पुर्ननिर्माणका लागि स्थानीयहरुसँग जग्गादानको लागि अनुरोध गरिएको बताउनु भयो ।

photo20220620darchual (1)

उहाँले अहिलेकै विद्यालय भएको स्थानमा माथिबाट पहिरो र तलबाट पहिरो गएको कारण विद्याललय निर्माण गर्न सोही स्थानमा थप जमिन नभएकोले स्थानीयहरुले जमिन दान गरेको अवस्थामा नयाँ भवन बनाइने बताउनु भयो ।

दह आधारभूत विद्यालयमा दुई जना दरबन्दीका शिक्षक र एक जना गाउँपालिकाबाट करारका शिक्षक कार्यरत छन् ।


नरेन्द्रसिह कार्की