विद्यालय आउजाउ गर्न तथा सामाजिक सुरक्षा भत्ता बुझ्नका जोखिमपूर्ण यात्रा

परशुराम नगरपालिकाका ज्येष्ठ नागरिकहरू ज्यान जोखिममा राखेर सामाजिक सुरक्षा भत्ता बुझ्न बाध्य भएका छन् ।

सामाजिक सुरक्षा भत्ता बुझ्नका लागी ट्युवमा खोला तर्नु बाहेक उनीहरूसँग अन्य विकल्प नभएको स्थानीयले बताए । 'न त तुईन छ । न त पुल नै छ । ज्यान जोखिममा राखेर नदी तर्नुपर्ने बाध्यता छ ।'-परशुराम नपा-४ की शान्तिदेवी राउटेले भनिन् ।

ज्येष्ठ नागरिक सामाजिक सुरक्षा भत्ता लिन मात्रै होइन विद्यालय जानका लागि विद्यार्थीहरू पनि जोखिमपूर्ण यात्रा गर्न बाध्य छन् ।

'संविधानमा नैसर्गिक अधिकारको रूपमा व्याख्या गरिएको अधिकार पाउनका लागि पनि ज्यान जोखिममा राखेर दैनिक नदी तर्नुपर्ने भएको छ ।'-सिद्धनाथ माध्यमिक विद्यालयमा कक्षा ९ मा अध्ययनरत विद्यार्थी नरेन्द्र साउदले भने ।

रङ्गुन नदीमा बिस्तारै पानीको सतह बढ्न थालेको छ । वर्षाको मौसम सुरु भएपछि विद्यार्थीलाई अब कसरी विद्यालयसम्म पुग्ने भन्ने चिन्ताले सताउन थालेको छ । सिद्धनाथ माविका प्रधानाध्यापक जयराज पन्तका अनुसार वर्षाको समयमा विद्यालय बन्द गर्नुपर्ने अवस्था आउन सक्छ ।

बैंकिङ कारोबार, व्यापार, अस्पताल, नागरिकता बनाउनसमेत जोखिमपूर्ण यात्रा गर्नुपर्ने स्थानीइले गुनासो गरेका छन् ।

इलाका प्रशासन कार्यालय जोगबुढाले ट्युवमार्फत खोला नतर्न सबैलाई आग्रह गरेपनि नदी वारपार गर्नका लागि ५ घण्टा हिँड्नु पर्ने बाध्यता भएकाले नदी तर्न बाध्य भएको स्थानीय राजबहादुर बोहराले बताए ।


भुपेन्द्र विष्ट