समाचारहरू

रोल्पाको लङ्ग्री गाउँपालिका–७ उडिनढुङ्गामा रहेको बालज्योती प्राथमिक विद्यालयमा स्वच्छ खानेपानीको अभाव हुँदा विद्यार्थीहरूले सास्ती खेप्नु परेको छ ।

बालुवासहितको पानीले विद्यार्थीको दैनिक दिवा खाजा पाक्ने गरेको छ । अन्यन्त्रबाट पानी बोक्न समय लाग्ने तथा स्वच्छ खानेपानीको अन्य विकल्प नभएकाले धुलो र बालुवा मिश्रित पानीले नै विद्यार्थीहरूकालागि दिवा खाजा पकाउन पर्ने विद्यालयका कार्यालय सहयोगी हेमकुमारी घर्तीले बताउनु भयो ।

विद्यालयमा कक्षा एकदेखि तीनसम्म करिब ३५ देखि ४० जना बालबालिकाहरूले अध्ययन गर्दै अएका छन् । धुलोसहितको पानी पिउनुपर्दा विभिन्न सङ्क्रमात्मक रोगको जोखिम समेत रहेको स्थानीयले बताएका छन् ।

विद्यालयमा खानेपानी मर्मतकोलागि लुङ्ग्री गाउँपालिकाले उक्त  वडामा १ लाख ५० हजार रूपियाँ बजेट छुट्टाइएको र त्यहि रकमबाट खानेपानी मर्मत गर्ने निवर्तमान वडा अध्यक्ष हर्कनारायण गिरीले बताउनु भयो ।

धारामा पानी नियमित आउछ तर बालुवा र धुलो सहितको पानी आउछ, त्यहि पानी विद्यार्थी तथा शिक्षकहरूले प्रयोग गर्दै आएका छन् ।

हाल खानेपानी मर्मतकार्य भइरहेको र जेठ महिनाभित्रै काम सम्पन्न हुने प्रधानाध्यापक खिमबिक्रम पुन मगरले बताउनु भयो ।

असार मसान्त भित्र सक्नुपर्ने काम मर्मतको जिम्मा लिएको व्यक्ति अस्वस्थ भई उपचारकालागि बाहिर गएकाले काममा केही ढिलाई भएको वडा अध्यक्ष हिराबहादुर पुनको भनाई रहेको छ ।

उक्त कार्यसम्पानदको निम्ती आफूले पहल गरिरहेको वडा अध्यक्ष हिराबहादुर पुनले बताउनु भयो ।

तिलक जिएम