समाचारहरू

सिमकोट गाउँपालिका–७ स्थित कैलाश माध्यमिक विद्यालय, डाँडाफयामा शौचालयको अभाव भएको छ । विद्यालयमा शौचालयको अभाव भएसँगै सो विद्यालयका विद्यार्थी र शिक्षकलाई समस्या भएको हो ।

विद्यालयमा थप समस्या त सेनेटरी प्याट मैत्री शौचालय नहुँदा छात्राहरूलाई कठिनाई हुने गरेको कक्षा १० मा आध्यायनरत छात्रा विस्ना सुनारले गुनासो गर्नुभयो । सेनेटरी प्याट मैत्री शौचालय नहुँदा रजस्वला भएको समयमा विद्यालयमा आउन समेत समस्या हुने गरेको छात्रा सुनारको भनाइ छ । उहाँका अनुसार सेनेटरी प्याड मैत्री शौचालय नहुँदा वातावरण दुर्गन्धित हुनुका साथै विद्यार्थीलाई असर पार्ने गरेको छ ।

हुम्ला जिल्लाका अधिकांश विद्यालयमा यो समस्या छ । तर पनि सदरमुकाम सिमकोटसँग जोडिएको वडामा रहेको उक्त विद्यालयमा केही हतसम्म समस्या हुनु नपर्ने भए पनि सो विद्यलयको अवस्था पनि अन्य विद्यालयकै जस्तो समस्या छ ।

विद्यालयका प्रधानाध्यापक मेज बहादुर बुढाका अनुसार पुरानो तीन ओटा शौचालय भए पनि गुणस्तरीय नभएपछि हाल शिक्षक र विद्यार्थीलाई सकस भएको छ । करिब ३ सय भन्दा बढी विद्यार्थी र १८ जना शिक्षक शिक्षिका रहेको विद्यालयमा पुरानो शौचालय प्रभावकारी नभएको प्रधानाध्यापक बुढाको भनाइ छ ।

सो विद्यालयमा हाल १ सय ८० जना छात्रा र पाँच जना शिक्षिका रहेका छन् । तर उनीहरू गुणस्तरीय सबैलाई शौचालयको व्यवस्था नहुँदा निकै कठिनाई हुने गरेको प्रधानाध्यापक बुढाले जानकारी दिनुभयो । भौगोलिक हिसावले हुम्ला पिछडिए पनि सो वडाका विद्यार्थीहरू सहज रूपमा शौचालय प्रयोग गर्न नपाउनुले थप समस्या भएको छ ।

विद्यालयका लागि नयाँ शौचालय निर्माण गर्न पनि नसकिने र विद्यालयलाई प्रयाप्त स्रोत नभएका कारण पुरानो शौचालय नै प्रयोग गर्न बाध्य भएको प्रधानाध्यापक बुढाले गुनासो गर्नुभएको हो । उहाँले सेनेटरी प्याडमैत्री शौचालय निर्माणका लागि विभिन्न सरकारी तथा गैर सरकारी निकायहरूलाई गुहार्दै आए पनि हालसम्म व्यवस्थापन हुन नसकेको बताउनु भयो । विद्यालयमा शौचालयको प्रयाप्त व्यवस्थापन नहुँदा कहिलेकाहीँ खुल्ला आकास मुनि पनि शौचालय गर्नुपर्ने बाध्यता रहेको प्रधानाध्यापक बुढाको भनाइ छ ।

नन्द सिंह