विद्यार्थी कुटपिट घटनाका अरोपित शिक्षकविरू उजुरी

 

कलैया उमनपा–१ स्थित डिभाइन इङ्गलिस बोर्डिङ स्कुलको कक्षा ६ मा अध्ययनरत प्रसौनी गाउँपालिका–५ प्रस्टोका १३ वर्षीय बालक आदित्य गुप्तालाई कुटपिट गरी घाइते बनाएको आरोपमा पीडित पक्षले सोही स्कुलका शिक्षक नुरु अन्सारी र विकास यादवविरूद्ध असोज १९ गते जिल्ला प्रहरी कार्यालयमा उजुरी दिएको छ ।

‘बिरामी छु भनेर विदा माग्दा शिक्षकद्वयले असोज १८ गते बिहान छोरालाई कुटपिट गरी घाइते बनाएछन् ।’– पीडित विद्यार्थीका बावु सञ्जय साहले भने ।

कुटपिटबाट घाइते भएका बालकको नारायणी उपक्षेत्रीय अस्पतालमा उपचार भइरहेको छ । घाइते बालकको गाला, कान र टाउकोमा चोट लागेको छ ।

छोरालाई कुटपिट गरेको घटना बुझ्न जाँदा आरोपितद्वयले आफूलाई नराम्रो व्यवहार गर्दै जहाँ जाने हो जाउ भनेपछि प्रहरीमा उजुरी दिएको पीडित बालकका बुबा साहले बताए ।

छोरा आदित्य एक हप्तादेखि बिरामी रहेकोले कुटपिट नगरी जानकारी गराउनु पर्नेमा कुटपिट गरी घाइते बनाउनु दुःखद् घटना भएको उनको भनाई छ ।

घटनाको अनुसन्धान गरी दुवै पक्षलाई बोलाएर छलफल गराउने जिल्ला प्रहरी कार्यालयका डिएसपी रञ्जितसिंह राठौरले बताए ।


भोलानाथ पौडेल