समाचारहरू

आधारभूत तहको शिक्षा निशुल्क र अनिवार्य तथा माध्यमिक तहसम्मको शिक्षा निशुल्क पाउने संवैधानिक हक विपरीत मन्थली माध्यमिक विद्यालयले विद्यार्थीसँग शुल्क उठाएको छ ।

संवैधानिक व्यवस्थालाई चुनौति दिँदै रामेछापका सामुदायिक विद्यालयले विद्यार्थीसँग शुल्क उठाइरहेका छन् ।

जिल्ला सदरमुकाम मन्थलीमा रहेको मन्थली माध्यमिक विद्यालयले विद्यार्थीसँग गैर कानुनी रूपमा शुल्क उठाएको छ । सो विद्यालयले विद्यार्थीबाट भर्नाको नाममा शुल्क उठाएर त्यसको रसिद विद्यार्थीलाई दिने गरेको छ ।

विद्यालयमा विद्यार्थीको सङ्ख्या अनुसार शिक्षक नभएका कारण निजी श्रोतबाट शिक्षक राख्नु परेको र ती शिक्षकलाई तलब खुवाउन शुल्क उठाएको विद्यालयका प्रधानाध्यापक टङ्कप्रसाद दाहालको भनाइ छ ।

विद्यालयले विगतमा पनि सहयोगको नाममा विद्यार्थीसँग रकम उठाउँदै आएको थियो । सो विषयलाई लिएर विद्यालय आलोचित भए पनि विद्यार्थीबाट पैसा उठाउन भने छाडेको छैन ।

विद्यालयले तोकेको शुल्क नबुझाएसम्म विद्यार्थी भर्ना नै नलिने अभिभावकको गुनासो छ ।

मन्थली नगरपालिका शिक्षा शाखा प्रमुख सौभाग्य न्यौपानेले पैसा नतिरेकै कारण कुनै विद्यार्थीलाई भर्ना नलिएर पढ्न नपाए विद्यालयलाई कारबाही गर्ने बताए पनि कार्यन्वयन भने हुन सकेको छैन ।

यसैबीच अखिल नेपाल राष्ट्रिय स्वतन्त्र विद्यार्थी युनियन (अनेरास्ववियु) रामेछापले संविधान विपरीत विद्यालयले विद्यार्थीसँग भर्ना शुल्कका नाममा पैसा असुल गरेको भन्दै ०८० जेठ १ गते जिल्ला प्रशासन कार्यालय रामेछापमा ध्यानाकर्षण पत्र बुझाएको छ । अनेरास्ववियुले सामुदायिक विद्यालयले विभिन्न बहानामा लिएको शुल्क खारेज गर्न माग गरेको छ ।

यस विषयमा सम्बन्धित विद्यालयसँग बसेर छलफल गरी आवश्यक कारबाहीको प्रक्रिया अघि बढाउने सहायक प्रमुख जिल्ला अधिकारी अनोज घिमिरेले प्रतिबद्धता जनाउनुभएको अनेरास्ववियु रामेछापका सचिव पुष्कर भट्टराईले जानकारी दिनुभयो ।

नेपालको संविधानको धारा ३१ को शिक्षाको अधिकार अन्तर्गत उपधारा २ मा प्रत्येक नागरिकलाई राज्यबाट आधारभूत तहसम्मको शिक्षा अनिवार्य र निशुल्क तथा माध्यमिक तहसम्मको शिक्षा निशुल्क पाउने हक हुने छ भन्ने व्यवस्था गरेको छ । तर सो विद्यालयले आधारभूत तहमा पढ्ने विद्यार्थीसँग समेत शुल्क लिएको छ ।

नवराज पथिक