समाचारहरू

सिमकोट गाउँपालिका वडा नम्वर ८ स्थित सैपाल हिमाल माध्यमिक विद्यालय बन्द गरि विद्यार्थीलाई विद्यालयको पुस्तक बोकाउन लगेपछि विद्यार्थीको पठनपाठन प्रभावित भएको छ ।

हालसम्म पाठ्यपुस्तक नपगेका अधिकांश विद्यालय मध्ये सिमकोट गाउँपालिका–८ को स्याडाँस्थित सैपाल हिमाल मावि पनि पाठ्यपुस्तक नपुगेको एक विद्यालय हो ।

सदरमुकाम सिमकोटबाट सोही गाउँपालिका–७ को धारापोरीमा गाडीमार्फत साउन ८ गते किताब पुगेपछि उक्त विद्यालयका विद्यार्थीलाई पुस्तक ढुवानी गर्न साउन ८ र ९ गते लगेपछि विद्यार्थीको पठनपाठन दुई दिन प्रभावित भएको स्याँडाका स्थानीयबासी जित बुढाले इन्सेक प्रतिनिधिलाई जानकारी दिनु भयो ।

स्थानीयबासी बुढाका अनुसार विद्यालयको जस्तो सुकै काम गर्नु पर्दा विद्यालयको कार्यालय सहयोगी हुँदाहुँदै शिक्षकहरूले करिव आठ जना विद्यार्थीलाई खटाएर धारापोरीबाट उक्त पुस्तक ओसार्न लगाउनु भएको हो । विद्यार्थीलाई किताब ल्याउने निहुँमा विद्यालय बन्द हुने, विद्यालय दिउँसो दुई बजे नै ताला बन्द गरेर विद्यार्थीको भविष्यमाथि खेलवाड गरेको आरोप अभिभावक बुढाले लगाउनु भएको छ ।

कक्षा ३ देखि ५ सम्मका विद्यार्थीलाई करिव तीन घण्टाको समय लाग्ने गाउँ धारापोरीसम्म पु¥याएर पुस्तक बोकाएर ढुवानी गर्दा बालश्रम भएको स्थानीय बुढाले गुनासो गर्नु भयो । हुम्लाका अधिकांश विद्यालयमा शैक्षिक सत्र सुरु भएको दुई महिना वितिसक्दा पनि अझैसम्म पाठ्यपुस्तक पुग्न सकेको छैन । विद्यालय बन्द प्रति स्याँडाका स्थानीयले साउन ९ गते दिउँसो विद्यालयमा गएर विरोध समेत जनाएका छन् ।

विद्यालय बन्द भएर विद्यार्थीको पठनपाठन प्रभावित भएको विषयमा उक्त विद्यालयका प्रद्यानाध्यापक देवबहादुर बुढाले यस्तो क्रियाकलाप प्रति आफ्नो पनि आपत्ति रहेको जनाउनु भयो । उहाले भन्नु भयो म विद्यालयमा थिइन विद्यालयकै कामका लागि सिमकोट गएको र अन्य शिक्षक साथीहरूले के गरे यस विषयमा जानकारी नभएको प्रतिकृया दिनु भएको छ ।

नन्द सिंह