विद्यार्थीद्वारा नोवेल मेडिकल कलेजमा तोडफोड, सुरक्षागार्डको लाठी प्रहारबाट एक घाइते

  ०७८ पुस २५ गते

नोवेल मेडिकल कलेज विराटनगरले जिल्ला प्रशासन कार्यालयमा भएको सहमति विपरित पठनपाठन सञ्चालन गरेको आरोपमा विद्यार्थीहरूले पुस २५ गते कलेजमा तोडफोड गरेका छन् ।

मेडिकल कलेज अगाडि रिले अनसनमा बस्न गएका विद्यार्थीमाथि त्यहाँ कार्यरत सुरक्षागार्डले लाठी चार्ज गर्दा नेकपा एकीकृत समाजवादीनिकट विद्यार्थी सङ्गठन अनेरास्ववियूका केन्द्रीय सचिव २८ वर्षीय किसन भगत घाइते हुनु भएको छ । उहाँको टाउको चोट लागेको छ । घाइतेको उपचार गरिएको विद्यार्थी नेता तुलसी घिमिरेले बताउनु भएको छ ।

अतिरिक्त शुल्क नबुझाउने विद्यार्थीलाई प्रवेश नदिई अन्य विद्यार्थीलाई मात्रै राखेर कक्षा सुरु भएपछि पुस २५ गते नोवेल मेडिकल कलेज विराटनगरमा विद्यार्थीले तोडफोड गरेका हुन् । विवाद साम्य नहुञ्जेल कक्षा रोक्ने सहमति विपरित नोवेलले कक्षा सञ्चालन गरेपछि एमबीबीएस प्रथम वर्षका विद्यार्थी आन्दोलनमा उत्रिएका थिए ।

नोवेल मेडिकल कलेजले पुस २२ गते जिल्ला प्रशासनसँग कुनै पनि अतिरिक्त शुल्क नलिने, विवाद साम्य नभएसम्म कक्षा नचलाउने सहमति गरेको थियो । तर, पुस २५ गते थोरै विद्यार्थी समावेश गरेर कक्षा चलाएपछि तनाव उत्पन्न भएको विद्यार्थी नेता तुलसी घिमिरेले बताउनु भयो । मेडिकल कलेज अगाडि रिले अनसन बस्न गएका विद्यार्थीमाथि त्यहाँ कार्यरत सुरक्षागार्डहरूले लाठी चार्ज गरेको आरोप आन्दोलनमा सहभागी विद्यार्थीहरूले लगाएका छन् ।

नोवेल मेडिकल कलेजमा १ सय विद्यार्थीको कोटा छ । कलेजमा भर्ना भएका ९६ जना विद्यार्थीमध्ये २४ जनाले अतिरिक्त शुल्क बुझाएका छन् । उनीहरूको पठन–पाठन भइरहेको आन्दोलनरत विद्यार्थीहरुले बताएका छन् । विद्यार्थीका अनुसार नौ भारतीय, १० छात्रवृत्ति र पाँच जनाले अतिरिक्त बुझाएकालाई कलेजले माथिल्लो तलामा राखेर कक्षा सञ्चानल गरीरहेको छ ।

चिकित्सा शिक्षा आयोगले निर्धारण गरे विपरीत नोवेलले ४ लाख ८२ हजार रुपियाँ अतिरिक्त शुल्क बुझाउन दबाब दिएपछि विद्यार्थी आन्दोलनमा उत्रिएका हुन् । पुस १४ गते देखि विद्यार्थी नोवेल मेडिकल कलेजविरूद्धको आन्दोलनमा छन् ।

सरकारले तोके बमोजिमको शुल्क लिन नोवेल मेडिकल कलेजका प्रमुख रामहरि घिमिरेलाई ज्ञापनपत्र बुझाएको भएपनि कलेजले अटेरी गरेको विद्यार्थी नेता नविन पहाडीको भनाइ छ ।

१४ लाख ८५ हजार रुपियाँ बुझाएर एमबीबीएस प्रथम वर्षमा भर्ना भएका विद्यार्र्थीसँग नोवेलले विभिन्न शीर्षकमा ४ लाख रुपियाँ भन्दा बढी रकम असुल्न खोजेको आन्दोलनरत विद्यार्थीको भनाइ छ । नोवेल मेडिकल कलेजका जनसम्पर्क अधिकृत नारायण दहालले कलेज प्रशासनले विद्यार्थीहरूको माग सम्बोधनको वातावरण बनाउँदै गएको बताउनु भएको छ ।

Photo 20220109 Morang (1)

Photo 20220109 Morang (2)


इन्सेक प्रदेश १ कार्यालय, विराटनगर