समाचारहरू

के आई सिंह गाउँपालिका–३ झिगाबस्ती गाउँका स्थानीय वर्षौँदेखि खानेपानीको समस्या झेल्दै बाध्य छन् । खानेपानीको व्यवस्था नहुँदा झिगाबस्ती गाउँका २ सय ५० घरपरिवार लामो समयदेखि कुँवा र खोलाको पानी पिउनु बाध्य छन् ।

एक गाग्री पानी भर्नका लागि घन्टौँ हिडेर पालो कुर्नु पर्ने भएकोले कहिले काही त दिनभरी पानीकै लागि लाइनमा बस्नु पर्ने बाध्यता रहेको स्थानीय सृजना बि.क.ले गुनासो गर्नु भयो ।

उहाँले भन्नुभयो– ‘बिहान उज्यालो नहुँदै घरबाट हिडेर जाने गरेका छौँ । पालो कुर्दा धेरै समय लाग्ने गर्छ । खानेपानीको समस्याले घरायसी काममा समेत असर पर्नेगरेको छ । कहिले त पानीकै लाईनका लागि समेत अफन्तहरुमा झगडा हुने गरेको छ ।’

घरघरमा धारा बनाए पनि पानीनै नआउने गरेका कारण स्थानीय व्यापारी र होटल व्यवसायीले समेत समस्या झेल्नु परेको स्थानीय कल्पना मल्लले गुनासो गर्नु भयो ।

चुनावको समयमा हरेक राजनीतिक दलका नेताहरुले खानेपानीको समस्या मुख्य एजेन्डा बनाउने गरेको भए पनि निर्वाचन सकिएपछि खानेपानीको मुद्दा सेलाउने गरेको स्थानीय इश्वरा नेपालीले गृुनासो गर्नु भयो ।

०४६ सालमा निर्माण गरिएको खानेपानी योजनाका इन्टेक, पाईप लगायतमा समस्या आएका कारण खानेपानीको समस्या चुलिएको बताउँदै समस्या समाधानका लागि प्रयास भइरहेको के.आई.सिं गाउँपालिका वडा नम्बर ३ का अध्यक्ष रामबहादुर कुँवरले बताउनु भयो ।

खानेपानीको समस्या समाधान गर्न प्रदेश सरकारले १० लाख र गाउँपालिकाले १० लाख रुपियाँ बजेटको व्यवस्था गरीसकेको कारण खानेपानी समस्या समाधानका लागि छिट्टै काम हुनगइरहेको गाउँपालिकका अध्यक्ष लोकेन्द्रबहादुर शाहीले बताउनु भयो ।

सुबास नेपाली