समाचारहरू

पछिल्लो २४ घण्टामा अविरल वर्षा र बाढीले ठूलो जनधनको क्षति पुर्‍याएको गृह मन्त्रालयले जनाएको छ । सबैभन्दा धेरै क्षति बागमती प्रदेशका जिल्लाहरूमा भएको छ ।

बाढी र पहिरोको प्रकोपबाट कोशी, बागमती र मधेस प्रदेशमा ६६ जनाले ज्यान गुमाएका, ६० जना घाइते भएका र ६९ जना बेपत्ता भएका गृह मन्त्रालयले असोज १२ गते जारी गरेको विज्ञप्तिमा उल्लेख छ ।

गृह मन्त्रालयका प्रवक्ता एवम् सहसचिव ऋषिराम तिवारीले पत्रकार सम्मेलन मार्फत विभिन्न स्थानमा भएको क्षतिको विस्तृत जानकारी गराउनु भएको छ ।

बाढी पहिरोबाट काठमाडौँ उपत्यकामा मात्रै ३४ जनाको मृत्यु भएको उहाँले बताउनु भएको छ । उपत्यकाभित्र काठमाडौँमा नौ जना, ललितपुरमा १८ जना र भक्तपुरमा पाँच जनाले ज्यान गुमाएका छन् भने उपत्यकामा कूल ११ जना घाइते भएका छन् ।

उपत्यकाका तीन जिल्ला बाहेक बागमती प्रदेशमा २३ जनाको मृत्यु भएको छ, जहाँ ३५ जना घाइते र ४० जना बेपत्ता भएका छन् ।

गृह मन्त्रालयद्वारा जारी विज्ञप्ति

कोशी प्रदेशमा ८ जनाको मृत्यु भएको छ भने ४ जना घाइते र ८ जना बेपत्ता भएका छन् । मधेस प्रदेशमा एक जनाको मृत्यु, दुई जना घाइते र चार जना बेपत्ता भएका छन् ।

सुरक्षाकर्मीहरूले ३ हजार जनालाई उद्धार गरिसकेको मन्त्रालयद्वारा जारी विज्ञप्तिमा उल्लेख छ । काठमाडौँ, काभ्रे, सिन्धुली र मकवानपुरमा हेलिकोप्टरको माध्यमबाट उद्धार कार्य गरिएको पनि विज्ञप्तिमा उल्लेख छ ।

अनलाइन डेस्क